थौं वामदेवयात ज्ञापन पौ लःल्हाइगु

येँ (सन्ध्या टाइम्स)/नेवाः-ताम्सालिङ संयुक्त संघर्ष समितिं थौं एमालेया वरिष्ठ उपाध्यक्ष वामदेव गौतमयात ज्ञापन पौ लःल्हाइगु जूगु दु। बल्खुइ थौं सनिलय् उगु ज्ञापन बीगु ज्याझ्वः दु। म्हिगः संघर्ष समितिं माओवादी केन्द्रीय ज्याकुथी वनाः अध्यक्ष प्रचण्डयात ज्ञापन पौ लःल्हाःगु खः। संघर्ष समितिं छुं दिं लिपा नेकां सभापति सुशील कोइरालायात नं ज्ञापन पौ लःल्हाइगु ज्याझ्वः दु। थ्व सिबें न्ह्यः समितिं प्रधानमन्त्री झलनाथ खनालयात ज्ञापन पौ लःल्हाःगु खः ।

थ्वहे दथुइ बन्द ताःलाकेत १० गते याये धयातःगु मोटरसाइकल र्‍याली स्थगित यानाः उखुन्हु लुँहितिं प्रचार जुलुस पिकाइगु जूगु दु। म्हिगः नेवाः स्वायत्त राज्य मंकाः संघर्ष समितिया मुँज्या च्वनाः उगु निर्णय याःगु खः। उगु जुलुस कुलेश्वरय् थ्यंकाः अनं तुं मसाल जुलुसय् रुपान्तरण जुइ। बन्द ज्याझ्वः ताःलाकेत थौं सुथय् मंकाः संघर्ष समितिं स्वनिगःया थीथी लागाया प्रतिनिधि नापं मंकाः संघर्ष समितिया घटकया प्रतिनिधितय्गु छगू भेला यात ।