अन्ततः राज्यमन्त्री लामापाखें राजीनामा
येँ (सन्ध्या टाइम्स)/ अन्ततः विवादास्पद अर्थ राज्यमन्त्री ल्हारक्याल लामां थःगु पदं राजीनामा बियादीगु दु। थौं सुथय् प्रधानमन्त्री झलनाथ खनाल समक्ष वय्कलं थःगु राजीनामा पेश यानादीगु खः ।
अर्थ राज्यमन्त्री नियुक्त जुइवं हे वय्कःया बारे थीथी अनियमित खँत सार्वजनिक जुइवं वय्कलं थौं थःगु राजीनामा बियादीगु दु। वय्कः नेपालय् सञ्चालन जुयाच्वंगु चीन विरोधी गतिविधि संलग्न जुयाच्वंगु जक मखु देशय् न्यागू नां तयाः पासपोर्ट तकं थीथी देशं कयातःगु खँ पिहां वःगु खः। वय्कःया बारे छगूयां लिपा मेगु खँ सार्वजनिक जुइवं एमाले दुनें हे वय्कःयात पदं चीके माःगु माग जुया वःगु खः। थ्व झ्वलय् प्रधानमन्त्री झलनाथ खनालं वय्कःयात थःगु बारे वयाच्वंगु थ्व खँयात कयाः स्पष्टीकरण बीत इनाप यानादीगु खः। तर वय्कलं स्पष्टीकरण बीगु पलेसा थौं राजीनामा बियादिल ।
प्रधानमन्त्रीया प्रमुख राजनीतिक सल्लाहकार प्रकाश ज्यालां राज्यमन्त्री लामां राजीनामा बियादीगु खँ पुष्टि यानादीगु दु। थौं हे औपचिरिक रुपं राज्यमन्त्री लामाया राजीनामाया खँ सार्वजनिक याइगु खँ नं वय्कलं कनादिल ।
