आः प्रचण्ड-वैद्य आमने सामने
येँ (सन्ध्या टाइम्स)/एकीकृत माओवादीया अध्यक्ष प्रचण्डं विद्रोहया लँपु त्वःताः शान्ति व संविधान निर्माण यायेगु प्रस्ताव हयेवं वरिष्ठ उपाध्यक्ष मोहन वैद्य किरण पक्षधर केन्द्रीय नेतातय्सं आः अध्यक्ष विरुद्ध थःपिं सक्रिय जुइगु रणनीति दयेकूगु दु। बैद्य पक्षधर केन्द्रीय दुजःत अध्यक्ष प्रचण्डया प्रस्ताव विरुद्ध सशक्त रुपं दनेत आः व्यापक तयारी यानाच्वंगु खँ नं सीदुगु दु ।
म्हिगः च्वंगु पार्टी पोलिटब्यूरो बैठकय् अध्यक्ष प्रचण्डं तत्काल विद्रोहय् वनेगु सम्भावना आः मदु धासें शान्ति व संविधानया मुल कार्यदिशा दयेकाः वनेमाः धइगु प्रस्ताव तःगु खः ।
अध्यक्ष प्रचण्डपाखें वःगु उगु प्रस्तावयात वैद्य पक्षधरं अन हे आपत्ति प्वंकुसें थुकिया बारे केन्द्रीय कमिटीया बैठकं जक निर्णय यायेगु खँ न्ह्यःगु खः। आः केन्द्रीय कमिटीया बैठक कन्हय् च्वनीगु जूगु दु। माओवादीं न्हापा विद्रोहया लाइन पास याःबलय् प्रचण्ड व बैद्य छगू थासय् लाःगु खःसा आः संविधान दयेकेगु लाइन पास जूबलय् प्रचण्ड व भट्टराई छथाय् लाःगु दु ।
