२०१७ सालय् जुलुस पिकाःपिंत हना
येँ (सन्ध्या टाइम्स)/२००७ सालं नेपाली जनतां प्राप्त याःगु प्रजातन्त्र २०१७ साल पौष १ गते जुजु महेन्द्रं हत्या यानाः पञ्चायत व्यवस्था हःगु विरोधय् दकलय् न्हापां २०१७ साल फागुण १२ गते येँ लागां पिहाँ वःगु न्हापांगु ऐतिहासिक जुलुसय् ब्वति कयादीपिं न्ह्य्म्ह न्ह्यलुवातय्त लोकतान्त्रिक नेवाः दबूपाखें म्हिगः हनेगु ज्या जुल। दबूया नायः गजेन्द्रमान मानन्धरया सभापतित्वय् उगु ज्याझ्वल ब्वति कयादीपिं आपालं योद्धात दुसां येँयापिं जक कयागु खँ नायलं कनादिल ।
न्ह्यलुवा भाजु टंकलाल श्रेष्ठ, उत्तमनारायण श्रेष्ठ, अमिरमान मुल्मी, रत्नकाजी तुलाधर, स्व. जुजुभाई प्रधानाङ्गया जहान कमला प्रधानाङ्ग, स्व. उद्धवबहादुर प्रधानाङ्गया काय् राकेश प्रधानाङ्ग व स्व. सुरेन्द्रमान सिंहया काय सुपाँय् सिंहयात हनापौ लःल्हानादीगु खः। न्ह्यलुवा उत्तमनारायण श्रेष्ठं प्रजातन्त्रया नामं छ्यं धस्वाकीपिं नेतात स्वयाः प्रजातन्त्रया निंतिं सक्रिय जुयाः ज्या याइपिं नेतातय्त पार्टी दुथ्याकेत इनाप यानादिल ।
पुलांम्ह मन्त्री पिएल सिंहं नेपाःया धात्थेंया आन्दोलन धइगु हे २०४६ सालया जक खः धासें आःयात मेमेगु खँ छखे तयाः न्हूगु पुस्ताया निंतिं थःपिंसं छु बीफु व हे जक यायेगु बांलाः धयादिल। सभासद् तीर्थराम डंगोलं उबलय् वय्कःपिं न्ह्यचिलाः संघर्ष याःगु हे थौं झीगु निंतिं प्रेरणा जूगु खः धासें अधिनायकवादया विरोधय् जुलुस पिहां वयेगु धइगु चाःचू खँ मखु धयादिल। नेपाली काँग्रेस येँ जिल्लाया सभापति भिमसेनदास प्रधानं पार्टी क्रियाशील जुइमाः धासें नेवाःत न्हापाथें सक्रिय मजूगु खँ नं कुलादिल
।
पुलांम्ह मन्त्री मार्शल जुलुम शाक्यं थौंया नेतात धायेबलय् जक समाजवादया ख्वापातं पुयाः प्रजातन्त्र मियाः नयाच्वंगु दु धयादिल ।
दबूया दुजः वीरेन्द्रभक्त श्रेष्ठ, श्यामलाल श्रेष्ठपिंसं नं न्ववानादीगु उगु ज्याझ्वलय् छ्याञ्जे भगवान शाक्यं सुभाय् देछानादीगु खः ।
उगु इलय् बेलायतया महारानी एलिजावेथ द्वितिया नेपाः भ्रमण वयेत्यंगुलिं प्रजातन्त्राया हत्या जूगु देशय् वय्कलं भ्रमण याये मजिउ धासें उकियात पनेत उगु ज्याझ्वः न्ह्याकूगु खः ।
