चीनं भारतीय धापूया खण्डन
नेपालया राजनीतियात अन्यौलग्रस्त देयेकीगु ज्या चीनं याःगु धकाः भारतं याःगु जिकिरयात चीनं खण्डन याःगु दु ।
चीनया परराष्ट्र मन्त्रालयया प्रवक्ता मा चाउ स्वीं मंगलवाः बेइजिङय् नियमित प्रेस सम्मेलनय् न्ववायेगु झ्वलय् भारतीय पत्रिका 'टाइक्स अफ इन्डिया'या थ्व सम्बन्धि रिपार्ट निराधार जूगु खँ धाःगु दु । वयेकलं चीन सरकारं मेगू देय्या आन्तरिक मामिलाय् हस्तक्षेप मयायेगु सिद्धान्तयात नाला वयाच्वंगु धासें नेपाःया थीथी राजनीतिक पार्टीत छप्पँ जुयाः शान्ति प्रकृयायात न्ह्यने यंकेमाःगु व राजनीतिक स्थिरता व आर्थिक विकासयात साकार यायेफइगु विश्वास चीनं काःगु धयादिल ।
वंगु मे ९ तारिख खुन्हु भारतीया न्हिपौ 'टाइम्स अफ इन्डियां' प्रधानसेनापतियात अवकाश बीगु पाखें दिकेत भारत सरकारं कुतः यानाच्वंगु ईलय् प्रधानमन्त्री प्रचण्डयात छगू पौ छ्वयाः चीनं अवकास बीगु निर्णययात समर्थन यायेगु धकाः न्ह्यथंनातःगु खः ।
अथेहे थीथी भारतीया नेतातय्सं चीनं नेपालय् 'अवैध च्यूता' तःगु धासें सार्वजनिक रुपं आलोचना यानावयाच्वंगु खः ।
