अर्थ राज्यमन्त्रीपाखें राजीनामा
विवादय् लानाच्वंम्ह अर्थ राज्यमन्त्री ल्हारक्याल लामां बिहीवाः राजीनामा बियादीगु दु । वय्कलं प्रधानमन्त्रीया ज्याकू वनाः थःगु राजीनामा लःल्हानादीगु खः । प्रधानमन्त्रीयात राजीनामापौ लःल्हायेधुंकाः अर्थ मन्त्रालयलय् छगू पत्रकार सम्मेलन यानाः वय्कलं राजीनामाया बारे जानकारी बियादीगु खः ।
वय्कलं थःत लाःगु द्वपंया बारे सरकारयात छानबिन यायेत ग्वाहालि जुइमाः धकाः राजीनामा बियागु धयादिल । वय्कलं थःयात लगे जूगु द्वपं कपोकल्पित व चरित्रहत्याया यायेत स्वःगु कथंया जूगु धयादिल । अथेहे वय्कलं थीथी द्वपं थःप्रति जक केन्द्रीत मजूसें प्रधानमन्त्री झलनाथ खनाल व सरकार विरुद्धया हे आक्रमणया शृंखला जूगु दावी नं यानादिल ।
वंगु चैत २८ गते अर्थ राज्यमन्त्रीलय् नियुक्त जुयादीम्ह लामानाप भारतीय पासपोर्ट नापं तिब्बती शरणार्थी कर्डा दुगु बुखँत सार्वजनिक जुइवं वय्कः विवादय् लाःगु खः । विवादय् लायेवं वय्कःयात राजीनामा बीत प्यखेरं दबाव लाःगु खः ।
