१४ प्रदेशया प्रस्ताव अन्तिम मखु : प्रचण्ड
एकीकृत नेकपा (माओवादी)या नायः पुष्पकमल दाहाल 'प्रचण्डं' संविधानसभाया राज्यपुर्नसंरचना समितिं न्ह्यब्वःगु १४ प्रदेशया प्रस्ताव हे अन्तिम विकल्प मदूगु खँ धयादीगु दु ।
व्यवसायिक पत्रकारिता केन्द्रं बिहीवाः यलय् याःगु 'नेपाःया सन्दर्भय् संघीयता' विषयक संवाद ज्याझ्वलय् वय्कलं राजनीतिक दलत दथुइया सहलह लिपा १४ प्रदेशयात म्हो नं यायेजिउगु धयादिल । वय्कलं संघीयता नेपाःया आवश्यकता स्वया जुइमाःगु खँय् बः बियादिल ।
शान्ति व संविधानयात पूर्णता बीत थःगु पार्टी गम्भीर जूगु धयादिसें वय्कलं थुकिया बारे अन्तिम निर्णय यायेत थःगु पार्टी दुने व्यापक सहलह जुयाच्वंगु धयादिल । वय्कलं जनताया शान्ति व परिवर्तनया चाहनायात साकार यायेत याकनं छगू निष्कर्षय् थ्यंकेगु धयादिल ।
अथेहे शान्ति व संविधानया विषयलय् खनेदुगु फुक्कं समस्याया समाधान न्हय्न्हुया दुने यायेफइगु दावी नं वय्कलं यानादिल । संविधान निर्माण यायेत मुक्कं ३५न्हु जक ल्यँ दनीगु इलय् वय्कलं विवाद समाधान यायेत ३५न्हु दिं नं अप्व जूगु धयादिसें दलत गम्भीर जूसाः न्हय्न्हुया दुने सहमति जुइफुगु दावी यानादिल ।
