प्रचण्डया प्रस्ताव राजनीतिक 'आइसब्रेक'
थीथी राजनीतिक दलया नेतातय्सं माओवादी नायः पुष्पकमल दाहाल 'प्रचण्ड'या राजनीतिक प्रस्तावयात राजनीतिक 'आइसब्रेक' जूगु खँ धाःगु दु ।
रिपोटर्स क्लबं थौं येँय् याःगु छगू साक्षात्कार ज्याझ्वलय् माओवादी, कांग्रेस व एमालेया नेतातय्सं प्रचण्डया प्रस्तावयात सकारात्मक जूगु टिप्पणी या:गु खः ।
भौतिक योजना तथा निर्माण मन्त्री नापं माओवादी नेता टोपबहादुर राइमाझीं प्रचण्डं शान्ति व संविधानयात मूल विषय वस्तु दयेकाः न्ह्यब्वयादीगु प्रस्ताव राजनीतिक 'आइसब्रेक' जूगु धयादिल । वय्कलं प्रचण्डया प्रस्ताव सर्वसम्मतं अनुमोदन यायेत माओवादीया केन्द्रीय मुँज्या सःतुगु दावी नं यानादिल ।
प्रधानमन्त्रीया राजनीतिक सल्लहाकार प्रकाश ज्वालां प्रचण्डया राजनीतिक प्रस्ताव सकारात्मक जूगु धयादिल । 'वय्कःया प्रस्ताव राजनीतिक 'कन्फ्यूजन'य् 'आइसब्रेक' खः ।'
अथेहे कांग्रेस केन्द्रीय दुजः डा. नारयण खड्कां नं माओवादी नायःया प्रस्तावय् शान्ति व संविधानयात प्राथमिकता बियातःगु धासें लसता प्वंकादिल । वय्कलं सेनां प्रस्ताव याःगु लडाकु समायोजनया प्रस्ताव माओवादी व कांग्रेस निगूलिं पार्टीं सकारात्मक रुपं काःगु धयादिसें राजनीतिक दलत इमान्दार जूसा: याकनं शान्ति प्रक्रिया क्वचाइगु विश्वास प्वंकादिल ।
