रेग्मी बारे वैशाख १५ गते सुनुवाइ
संवैधानिक परिषदं प्रधानन्यायाधीशय् सिफरिस याम्ह सर्वोच्च अदालतया वरिष्ठ न्यायाधीश खिलराज रेग्मीया बारे वैशाख १५ गते व्यवस्थापिका संसदया विशेष सुनुवाइ समितिलय् सुनुवाइ जुइगु जूगु दु ।
संसदीय सुनुवाई समितिया थौं सिंहदरवारय् च्वंगु मुँज्यां रेग्मीयात १५ गते सुनुवाईया निंतिं सःतेगु निर्णय याःगु खः । सुनुवाइया झ्वलय् रेग्मीयात लाःगु द्वपं व वय्कःया भावी योजना बारे न्यनेकने याइगु खँ धाःगु दु ।
वर्तमान प्रधानन्यायाधीश रामप्रसाद श्रेष्ठ वइगु वैशाख २२ गते उमेरहदया हुनिं अवकाश कायेत्यंगुलिं रेग्मीयात प्रधानन्यायाधीशय् सिफारिस याःगु खः । वंगु चैत २८ गते च्वंगु संवैधानिक परिषदया मुँज्यां वरिष्ठता व आःतक छुं नं विवादय् मवगु धासें रेग्मीयात प्रधानन्यायाधीशय् सिफारिश याःगु खः । वय्कःयात राष्ट्रपतिं प्रधानन्यायाधीश पदय् नियुक्त यानादी ।
