कंसाकारं मुद्दा त्याकल, आः विमान वइ ला?
येँ (सन्ध्या टाइम्स)/ नेपाल वायुसेवा निगमया निलम्बित कार्यकारी अध्यक्ष सुगतरत्न कंसाकारयात म्हिगः विशेष अदालतं सफाई बियाः वय्कःयात लानाच्वंगु भ्रष्टाचारया मुद्दां मुक्त याना बिल। तर भाजु कंसाकार थ्वहे वइगु असार महिनां हे सेवापाखें अवकास काइम्ह जुयाच्वंगुलिं वय्कः मुद्दां त्याःसां नं नेपाल वायुसेवा निगमं न्हूगु विमान हयेगु ज्या धाःसा याये मफइगु जूगु खँ सूत्रं धाःगु दु ।
न्हूम्ह पर्यटन मन्त्रीं न्हापा राजनीतिक नियुक्ति कयातःपिं फुक्कं पदाधिकारीतय्गु राजीनामा माग यायेधुंकूगु कारणं भाजु कंसाकारं नं थौं पुलांगु पदय् पुनर्स्थापना जुइसातकि थौं हे राजीनामा बीमालीगु अवस्था दु धकाः नं धाःगु दु। छुं जुयाः वय्कलं राजीनामा मबिल हे धाःसां नं आः वइगु असारं वय्कःया कार्यकाल फुइ हे नं त्यंगु दु ।
सूत्रं बिउगु जानकारी कथं आः यदि नेपाल वायुसेवा निगमं हानं विमान न्यायेगु खःसा पुलांगु भाः स्वयां २ अर्ब तका अप्वः पुलेमालीगु अवस्था वइ। छुं जुयाः कंसाकार मार्फत हे विमान न्यायेगु ज्या जुल धाःसा हानं बांलाःगु स्वापूया कारणं एअरबसं हानं छक्वः पुलांगु हे भावं विमान बी फइगु नं सम्भावना दु। यदि पुलांगु हे भावं विमान हयेत कुतः यायेगु खःसा निगमय् हानं कंसाकारयात हे म्याद थपे यानाः कार्यकारी अध्यक्ष दयेकेमालीगु खनेदुगु दावी नं सूत्रं याःगु दु ।
यदि कंसाकार थःगु कार्यकाल क्वचायेवं पदमुक्त जुइगु खःसा वय्कलं भ्रष्टाचारया मुद्दा त्याकादीसां निगमयात विमान हयेके मबीगु कुतः यानाच्वंपिं तत्वत धाःसा थःगु षडयन्त्रय् सफल हे जुइगु खँ धाःगु दु ।
