कंसाकारयात विशेष अदालतपाखें सफाइ
मेपिं खुम्हेसितं सफाइ, स्वतः पुनःर्बहाली जुइगु
येँ (सन्ध्या टाइम्स)/नेपाल वायु सेवा निगमया निंतिं एअर बस न्यायेत बिउगु बैनाय् भ्रष्टाचार याःगु द्वपनय् विशेष अदालतं निलम्बन याःम्ह निगमया कार्यकारी निर्देशक सुगतरत्न कंसाकारया लिसें मेपिं खुम्हसित नं सफाई बिउगु दु। कार्यकारी निर्देशक कंसाकारया लिसें मेपिं खुम्हेसित नं सफाई बीवं आः वय्कःपिं सकलें स्वतः पुनःर्बहाली जुइगु जूगु दु ।
विशेष अदालतया अध्यक्ष गौरीबहादुर कार्की, सदस्यपिं ओमप्रकाश मिश्र व केदारप्रसाद चालिसेया इजलासं कंसाकारं एअर बस न्यायेत बिउगु बैनाय् भ्रष्टाचार मयाःग ठहर यासें सफाई बिउगु खः। अदालतं वय्कःपिनिगु मुद्दाय् जूगु सुनुवाइ लिपा जारी याःगु फैसलानामाय् 'कंसाकारं सार्वजनिक संस्थाया ध्यबा 'रिश्वत' काःगु, घुस नःगु वा हिनामिना यानाः कायेगु नयेगु यानाः थःगु व्यक्तिगत हित जुइगु ज्या याःगु खने मदुगुलिं भ्रष्टाचारया दावीं सफाई दइगु ठहर याःगु दु' धयातःगु दु ।
अथे हे कंसाकारयात सफाई बीवं वय्कःयात ग्वाहालि याःगु ल्याखं भ्रष्टाचराया मतियार जूगु धकाः द्वपं बियातःपिंत नं स्वतः सफाई दइगु अदालतया फैसलाय् न्ह्यथनातःगु दु।
निगमया कार्यकारी निर्देशक कंसाकारं 'वाइड बडी' व 'न्यारो बडी'या निगः एअर बस जहाज न्यायेत फ्रान्सेली विमान कम्पनीयात न्यागू करोड न्हय्स्वंगू लाख न्हय्न्याद्वः 'लक अप मनी' कथं छ्वःगु बैना ध्यबाय् भ्रष्टाचार याःगु द्वपं बियाः अख्तियार दुरुपयोग अनुसन्धान आयोगं वय्कःया लिसें मेपिं खुम्हेसित नं मुद्दा दाष्र याःगु खः ।
मुद्दा दायर जुइवं एअर बस कम्पनीं नं बैना वापत बिउगु ध्यबा लित छ्वया हःगु खःसा वयां लिपा वय्कःपिनि विरुद्ध तयातःगु मुद्दा नं प्रभावहीन जुजुं वंगु खः। कंसाकारया लिसें मेपिं खुम्हेसित मुद्दा दायर यायेवं बैना वापत छ्वःगु ध्यबाय् भ्रष्टाचार मजूगु धासें निगमया कर्मचारीतय्सं ज्या ठप्प यायेगु नापं प्रदर्शनय् तकं कुहां वःगु खःसा कंसाकारयात धरौटी वापत माग याःगु ध्यबा प्राइम कमर्सियल बैंकं बैंक ग्यारेन्टी च्वंगु खः ।
