'नेपाः भारतया उच्च प्राथमिकता'

भारतया विदेशमन्त्री एसएम कृष्णां भारतया उच्च प्राथमिकताया धलखय् नेपाः दुगु खँ धयादीगु दु । वय्कलं नेपाः व भारत दथुइया स्वापूयात भारतं उच्च प्राथमिकता बिउगु धयादिल ।

स्वन्हुन्यंकया नेपाः भ्रमणया निंतिं बुधवाः येँय् थ्यंकादीम्ह कृष्णां थःगु नेपाः भ्रमण द्विपक्षीय स्वापु क्वातुकेगु व बांलाकेगु निंतिं ग्वाहालि जुइगु विश्ववास प्वंकादिल । भ्रमणया झ्वलय् वय्कलं नेपालय् भारतं याइगु आर्थिक ग्वाहालिया बारे नं सहलह याइगु जूगु खः ।

वय्कलं वीरगञ्जय् निर्माण जुइगु मंकाः भन्सार विन्दु व तराई सतक निर्माणया शिलान्यास नं यानादी । अथेहे नेपाः भ्रमणया झ्वलय् भारतीय विदेशमन्त्री कृष्णां नेपाःया राष्ट्रपति, प्रधानमन्त्री, अर्थमन्त्री नापं थीथी राजनीतिक दलया नेतात नापलानादीगु ज्याझ्वः दु ।