प्रधानमन्त्री आकाझाकां राष्ट्रपति भवनय्
येँ (सन्ध्या टाइम्स)/तःन्हु न्ह्यवंनिसें राष्ट्रपति रामवरण यादवं यानाच्वंगु परामर्शया ज्या खनाः तम्वयाच्वंम्ह प्रधानमन्त्री झलनाथ खनाल थौं सुथय् आकाझाकां राष्ट्रपति भवन झाःगु दु ।
संविधान जारी यायेगु ई धकाः तोके यानातःगु जेठ १४ गते कुन्हु संविधान पित बी फइगु सम्भावना मदयेवं वयां लिपा छु यायेगु धकाः प्रम खनालं यानातःगु बिचाः बारे सहलह यायेत वय्कः झाःगु जुइफु धकाः नं सूत्रं अनुमान याःगु दु।
प्रधानमन्त्री झलनाथ खनालं छुं ई न्ह्यः इलय् संविधान जारी मजुल धाःसा छु याये माली धकाः राष्ट्रपति रामवरण यादवं थीथी मनूत सःताः परामर्श यानादीगु खःसा उकियात कयाः प्रम खनालं असन्तुष्टि प्वंकादीगु खः ।
सूत्रं धाः कथं प्रम खनालं राष्ट्रपतिलिसे सरकारयात पूर्णता बीगु ज्याय् पिहां वयाच्वंगु अन्यौल बारे नं सहलह यानादी धाःगु दु ।
प्रम खनाल थौं सुथय् पूर्व जानकारी बिनाः राष्ट्रपति भवन वःगु खँ राष्ट्रपति कार्यालयं पुष्टि याःसां प्रमया प्रेस सल्लाहकार सूर्य थापायात स्वापू तयाबलय् वय्कलं धाःसा थःत उकिया जानकारी मदुगु खँ कनादिल। नापलाःगु बारे विस्तृत खँ थ्व ध्वः च्वया च्वनागु इलय् तक मवःनि ।
