पुलांगु स्वनिगःया किपा ब्वज्या

येँ (सन्ध्या टाइम्स)/न्याक्वःगु अन्तर्राष्ट्रिय नेपालमण्डल बौद्ध संस्कृति सम्मेलन थ्वहे वइगु वैशाख १० निसें १२ गते तक स्वन्हुयंक याइगु जूगु दु ।

सम्मेलनय् थीथी कथंया ब्वज्यात जुइ। उकी मध्य छगू मूआकर्षण जुइगु उगु ब्वज्या धाःसा किपा ब्वज्या जुइगु खँ धाःगु दु। येँ, यल व ख्वपया बहाबही, पञ्चदान पर्व, सम्यक दान पर्व, स्वयम्भू बौद्ध चारुमति विहार, सिफूच्व, जामाचो, ध्यनाचो, शिवपुरी, बाघद्वार, स्वनिगः कुमारी, जनबहाद्यः जात्रा, मणिचुड, बज्रजोगिनि, श्री शान्तिघत बज्रधातु चैत्य श्रीघः, करुणामय जात्रा महाबौद्ध, मतयाः, दिपंखा यात्रा, ऐतिहासिक तोरण, प्यंग थुर, नमो बुद्ध नाम संगिति, चर्या नृत्य, सप्तमि धानोतर पूजाथें जाःगु थीथी विषयलिसे स्वापू दुगु किपात ब्वइगु जूगु दु। थुज्वःगु फुक्व विषयलिसे स्वापू दुगु किपा न्हापांखुसी ब्वज्या जुइत्यंगु खँ नं ग्वसाः खलकं धाःगु दु। थुकिया लिसें गुंला बाजं, पँय्ताः बाजं, दाफा भजन, श्रृङ्गभरी बाजं, साय्मितय् चैत्य धलं, अष्टमी ब्रत, लिच्छिविकालीन श्रोत थिमि, पनौति, किपूया बौद्ध कला संस्कृति नापं दोलखाया चैत्य करुणामय जात्रा चित्लाङ्गया चैत्य, दशकर्म, थीथी नेपाल मण्डलया बौद्ध कला संस्कृतिया किपा नं ब्वइगु जूगु दु। किपा ब्वज्याया हे झ्वलय् लुम्बिनी, कपिलवस्तु, रामग्राम, १५ औं विश्व बौद्ध सम्मेलनया किपात नं ब्वज्याय् तइगु जानकारी ग्वसाः खलःपाखें वःगु दु ।

ग्वसाः खलःया धापूकथं स्वन्हुयंकं जुइगु उगु ज्याझ्वलय् गोष्ठी, साँस्कृतिक ज्याझ्वः, वाद्यवादन, चर्या नृत्य, मण्डला ब्वज्या व बज्राचार्य पूजा समारोह, हलंज्वलं, शिलालेख व हस्तलिखित ग्रन्थ व सफू ब्वज्या नं जुइगु जूगु दु। ब्वमिपिनिगु निंतिं थुगु ब्वज्या अतिकं महत्वपूर्ण जुइगु भलसा नं ग्वसाः खलकं काःगु दु ।