शान्तपूर्वक शुरु जूगु बिस्काः ल्वापु यानाः क्वचाल

ख्वप (सन्ध्या टाइम्स)/थुगुसी ल्वापुख्यापु छुं हे मयासे शुरु जूगु नांजाःगु बिस्काः जात्राया समापन धाःसा म्हिगः ल्वापुपाखें हे जुल। तर म्हिगः चान्हय् ल्वापु जूगु कारणं उकियात अप्वः मनूतय्सं धाःसा मखन ।

म्हिगः बिस्काःया अन्तिम न्हि भैलःखः सालाः दत्तात्रयपाखे यंकाच्वंगु इलय् तेखाचो व न्यातपौ देगः लागाय् निक्वः ल्वापु जूगु खः। तेखाचों रथ सालाः दत्तात्रय यंकाच्वंगु इलय् रथयात हानं क्वय् सालेगु लागिं फहीकेवं प्रहरी वयाः पूरा रथयात हे घेरे याना बिल। वयां लिपा जात्राय् वयाच्वंपिं मनूतय्सं प्रहरीयात अन हे अप्पां कयेकेगु शुरु याःगु खः। थ्व झ्वलय् छुं प्रहरी घाःपाः जूगु दुसा प्रहरीं ६० म्ह ति मनूतय्त ज्वंगु नं दु। तर उमित म्हिगः हे त्वःता छ्वये धुंकूगु दु। ल्वापुं यानाः चान्हय् हे मनूत भागाभाग जुइमाःगु खः ।

थ्वहे झ्वलय् म्हिगः तालाक्व त्वालय् थनातःम्ह ल्हाः मदुम्ह यःसिंद्यः नं क्वःथलेगु ज्या जुल। ल्हाः मदुम्ह यःसिं क्वःथले धुंकाः छझाः गाःहितिइ त्वालय् दिकातःगु भैलःखः सालाः खः जुकेगु ज्या नं जूगु खः। म्हिगः हे सनिलय् उगु खःयात हाकनं गाः हितिं थकयाः थःने क्वःने सालाः तःजिक खः जात्रा यायेमाःगु खःसा वहे जात्राया इलय् ल्वापु जूगु खः। बिस्काःया अन्तिम दिं भैलःद्यः थहां बिज्यायेवं बिस्काः क्वचाःगु माने याइ। बिस्काः जात्राया झ्वलय् म्हीग न्हिछिं त्वाः त्वालय् क्वत हयातःपिं द्यःयात द्यः सगं बीगु ज्या जूगु खःसा सनिलय् छुमा गणेद्यःया जात्रा नं तःजिक क्वचाःगु खः। म्हीग ब्रम्हायणी जात्रा नं क्वचाःगु दुसा प्यन्हु न्ह्यः महालक्ष्मी व महाकालीया खः ल्वाकेगु जात्रा नं सौहार्दपूर्ण रुपं क्वचाःगु दु ।