शान्ति सुव्यवस्था कायम यायेत सुरक्षा प्रमुखयात निर्देशन
राष्ट्रिय मानवअधिकार आयोगं लिपांगु ईलय् देशय् असुरक्षा अप्वयावंगु धासें शान्ति सुव्यवस्था कायम यायेत सुरक्षा निकायया प्रमुखतय्त निर्देशन ब्यूगु दु ।
सेनापति प्रकरण लिपाः स्यनाःवंगु राजनीतिक संकटया कारण थीथी जिल्लाय् असुरक्षा अप्वयेवं आयोगं सुरक्षा निकायया प्रमुखतय्त सःताः थंज्याःगु निर्देशन ब्यूग खः ।
आयोगं शान्तिपूर्ण विरोधया ज्याझ्व निर्वाध रुपं संचालन जुइ बीत व ल्वापू, अपहरण थंज्याःगु ज्या दीकेत आवश्यक सतर्कता नालेत नं सुझाव ब्यूगु दु । आयोगं एकीकृत माओवादीया भातृ संगठनया कार्यकर्ताया आक्रमणया कारण संखुवासभा, झापा, मोरंग् लगायतया जिल्लाय् मेगू दलया कार्यकर्ता विस्थापित जूगु खँ धाःगु दु । नापं आयोगं दक्व जिल्लय् अधिकारकर्मी, नागरिक समाज व सुरक्षा निकाय दथुइ शान्ति सुव्यवस्था कायम यायेत तत्काल आवश्यक पहल यायेत नं सुझाव ब्यूगु दु ।
यलय् च्वंगु आयोगया केन्द्रीय ज्याकूथी जूगु सहलहलय् आयोगया अध्यक्ष केदारनाग उपाध्याय लगायत पदाधिकारीत, गृह मन्त्रालयया सचिव, नेपाल प्रहरी व सशस्त्र प्रहरी महानिरीक्षक लगायत सुरक्षा अधिकारीतय्सं ब्वति काःगु खः ।
