हरिवंशया जहान मन्त
लोकंह्वाःम्ह हास्य कलाकार हरिवंश आचार्यया जहान मिरा आचार्य थौं सुथय मन्त । नुगःचु ल्वचं कयाच्वंम्ह आचार्य म्हीग मोडेल अस्पताल भर्ना जुयादीगु खः । म्हिगः त:च्वः जुसेंलि भेन्टिलेटरय तया कृतिम सासः ल्हाकाःतःगु खः ।
४६ दँ दुम्ह आचार्य थौं सुथय् मदुगु डाक्टरतय्सं जानकारी ब्यूगु खःसा थौं हे पशुपतिइ यंकूगु दु । वय्कःयात थौं हे मि तइगु नं जानकारी ब्यूगु दु ।
बि.सं. २०४० य् लोकंह्वाःम्ह हास्य कलाकार हरिवंश आचार्यलिसें इहिपा याःनादीम्ह मिरा स्वयं नं लोकंह्वाःम्ह संचारकःमि खः । वय्कः रेडियो नेपाल लिसें थीथी एफएमया ज्याझ्वः न्ह्याकामि ख:सा थीथी विज्ञापनय् नं थःगु सः तयादीगु दु ।
प्रधानमन्त्रीपाखें बिचाः हायेका
लोकंह्वाःम्ह हास्य कलाकार हरिवंश आचार्यया जहान मिरा आचार्य मदुगुलिं प्रधानमन्त्री झलनाथ खनालं बिचाः हायेकादीगु दु । थौं छगू बिज्ञप्ति पितब्यूसें मदुम्ह आचार्य लोकंह्वाःम्ह संचारकःमि व रंगकःमि नं जूगु न्ह्यथसें वय्कः मदुगुलिं दुःखप्वंकुसें श्रद्धांजली देछाया धयातःगु दु ।
