'राष्ट्रपति शासनपाखें देशय् निरंकुशता लादे याइ'
एकीकृत नेकपा (माओवादी)या पोलिट्व्यूरो दुजः हितमान शाक्यं राष्ट्रपति शासनपाखें देशय् निरंकुशता लादे याइगु ग्याःचिकु अप्वयाः वंगु खँ धयादीगु दु ।
भेरी-करणाली राष्ट्रिय मुक्ति मोर्चा, नेवाः राज्य समन्वय समितिं थौं ग्वसाः ग्वःगु ज्याझ्वलय् न्ववानादिसें नेता शाक्यं भारत भ्रमणपाखें लिहाँवये धुनेवं हे राष्ट्रपति रामवरण यादवं निगू तिहाईपाखें संविधान जारी यायेमज्यूगु धकाः प्वंकादीगु अभिव्यत्तियात सामान्य अर्थय् कायेमज्यूगु धयादिल ।
पूमवंगु संविधान पिथनेगु धइगु खँ नं राष्ट्रपति शासन स्वयाः म्हो खत्तरनाक मजुपगु शाक्यया धापू खः । वय्कलं जनतायात अधिकार सम्पन्न मयातले माओवादी निरन्तर संघर्षय् दयाच्वनीगु प्रतिवद्धता प्वंकादिल । क्षेत्रीय उत्पीडनया मुद्दायात कयाः न्ववायेत भेरी करणालीवासीत एकताबद्ध जुयाः न्ह्यःज्यायेत इनाप नापं यानादिल ।
