पासपोर्ट दुरुपयोग याःगु द्वपनय् प्रहरीं सभासद्पिं ज्वन
ह्याउँगु पासपोर्ट दुरुपयोग याःगु द्वपनय् प्रहरीं सभासद्पिं वीपी यादव व गायत्री साहयात ज्वंगु दु । सभासद्पिंत संसद भवन पिनेपाखें हे ज्वंगु खः । अख्तियार दुरुपयोग अनुसन्धान आयोगया निर्देशनय् केन्द्रीय अनुसन्धान ब्युरों सभासद्पिंत ज्वंगु खः । उमित येँ प्रहरी परिसरय् तयातःगु दुसा थप जानकारी बिइगु नितिं प्रहरीं सनिलय् पत्रकार सम्मेलनया ग्वसाः नापं ग्वःगु खः ।
प्रहरीं पासपोर्ट दुरुपयोग याःपिं सभासदतय्त ज्वनागु जानकारी संविधानसभाया नायः सुवास नेम्वाङयात नापं जानकारी बिइधुंकूगु संसद सचिवालयं जानकारी ब्यूगु दु । संसद अधिवेशन न्ह्यानाच्वंबलय् सभासदतय्त ज्वने न्ह्यः सभामुखयात जानकारी बिइमाःगु प्रावधान दु । साहया नामय् जारी जूगु ०१९८२६ व यादवया नामय् जारी जूगु ०१९८९३ ल्याःया ह्याउँगु -कुटनीतिक) राहदानी ज्वनाः अस्टे्रलिया वनेत्यंगु झ्वलय् अबुधावी थ्यंपिं पृथ्वी छन्त्याल व मेम्हसिया नां सीमदुम्ह छम्ह मिसायात अध्यागमनं लित बिइवं उमित प्रहरीं छानबिन यानाच्वंगु खः । सभासद्या नामय् भिसा जारी जूगु पासपोर्ट क्वबियाः झण्डै स्वला न्ह्यः अस्ट्रेलियाया नितिं ब्वपिं उमित ज्वंगु खः ।
