अर्थराज्य मन्त्रीबारे राष्ट्रपतिपाखें च्यूताः प्वंकल
राष्ट्रपति डा. रामवरण यादवं न्हूम्ह अर्थराज्य मन्त्री ल्यार रक्याल लामाया बारे पिहांवयाच्वंगु बुखँ बारे च्यूताः प्वंकादीगु दु । लामानाप भारतीय पासपोर्ट व तिब्बती शरणार्थीया कार्ड तंक दुगु बुखँ पिहांवयेवं राष्ट्रपति यादवं च्यूताः प्वंकादीगु खः ।
प्रधानमन्त्री झलनाथ खनालनाप थौं सुथय् राष्ट्रपति भवन शितल निवासय् जूगु खँल्हाबंलाय् यादवं विवादय् लाःम्ह अर्थराज्य मन्त्रीया हुनिं मित्रराष्ट्रनाप छुं लिच्वः लाइगु खःला धकाः च्यूताः तकं प्वंकादीगु खः । लामायात अर्थराज्य मन्त्रीलय् नियुक्त यायेवं चीनं उकि आपत्ति प्वंकेधुंकूगु दु ।
लिसःलय् प्रधानमन्त्री खनालं अर्थराज्य मन्त्रीया बारे सत्यतथ्य पत्ता लगे यानाः न्ह्याःवनीगु धयादीगु खः ।
उगु हे इलय् राष्ट्रपति व प्रधानमन्त्री दथुइ शान्ति प्रक्रिया व संविधान निर्माणया विषयलय् नं सहलह जूगु खः । अथेहे देशय् शान्ति सुरक्षाया अवस्था स्यनावनाच्वंगु प्रति नं राष्ट्रपति यादवं च्यूताः प्वंकादीगु खः ।
Related Stories
अर्थराज्य मन्त्री लामा गनया नागरिक?
