प्रमयात नेवाः व तामाङया ज्ञापनपौ

येँ (सन्ध्या टाइम्स)/ थ्वहे वइगु बैशाख १४ गते आह्वान यानातःगु नेवाः व ताम्सालिङ बन्द सफल यायेत नेवाः स्वायत्त राज्य मंकाः संघर्ष समिति व ताम्सालिङ संयुक्त संघर्ष समितिया पदाधिकारीतय्सं प्रधानमन्त्री झलनाथ खनालयात नापलाइगु जूगु दु । कन्हय् न्हिनय् ११ बजे वय्कःया ज्याकू सिंहदरवारय् संघर्ष समितिया पदाधिकारीतय्सं बन्द यायेमाःगु कारण व थःपिनि माग बारे प्रधानमन्त्री झलनाथ खनालयात ध्वाथुइकीगु जूगु दु । लिसें स्वंगू तःधंगु दलया नेतातय्त नं याकनं हे ज्ञापनपत्र बीगु ग्वसाः दु ।

बन्द ज्याझ्वः तयारीया झ्वलय् थौं सुथय् यलय् ज्यापु समाज यल व बौद्ध विहार संघ यलया मंकाः मुँज्या जुल । उगु मुँज्यां वइगु बैशाख १३ गते सनिलय् यलया मंगलबजारं तःजिगु मसाल जुलुस पिकायेगु व १४ गते यल देय् ठप्प यायेगु क्वछिउगु दु । नापं उगु मुँज्यां कन्हय् निसें हे झिन्हुयंकं यलया थीथी थासय् कोण सभा व प्रचार र्‍यालीत याना वनेगु नं क्वःछिउगु दु । थुगु बन्द ज्याझ्वः ताःलाकेत सांस्कृतिक रुपं प्रचार र्‍याली यायेगु नं मुँज्यां क्वःछिउगु दु ।