तःजिक क्वचाल उदाय् मुना ज्याझ्वः

येँ (सन्ध्या टाइम्स)/ उदाय् समाजया ग्वसालय् जूगु 'उदाय् मुना' वंगु शनिवाः तःजिक क्वचाल । येँया भृकुटी मण्डपय् जूगु उगु ज्याझ्वः उदाय् समाजया नायः डा. रुपज्योति कसां त्वाःदेवातय् मत च्याकाः उलेज्या यानादीगु खः । ज्याझ्वलय् समाजया न्वकुनापं मलू समितिया संयोजक डा. प्रेमरत्न स्थापितं उदाय् मुनाया बारे ध्वाथुइक कनादीगु खः ।

उदाय् समाजया संरक्षकपिं कुलवीरिसंह तुलाधर, द्रब्यमानिसंह तुलाधर, ज्यासना पुचःया दुजःपिं व उदाय् मुना ज्याझ्वःया उप-समितिया संयोजकिपं व श्रोत व्यक्तिपिं नं ज्याझ्वलय् उपस्थित जुयादीगु खः । ज्याझ्वलय् उपसंयोजक व श्रोत व्यक्तिपिंसं ब्वज्या, थाय्बाय्, मनोरञ्जन, नसा ज्वलं, ब्यानर, प्रचार प्रसार थेंज्याःगु खँया बारे जानकारी बियादीगु खः ।

सम्पूर्ण उदाय् एकता क्वातुकेगु उदाय् संस्कृति संस्कार रितिस्थितिया जानकारी बीगु व 'जि उदाय्' धइगु भावना ब्वलंकेगु ताः तयाः न्ह्याकूगु उदाय् मुनां उदाय्तय्त छप्पँ छधी यायेगु छथासं च्वनाः थःथितिपिंनाप खँल्हाबल्हा यायेगु व न्हूगु पुस्तायात नं थःगु जातीय लजगाः व रितिथिति म्हसीके बीगु ज्याय् ग्वाहालि जुइगु खँय् ग्वसाः खलः आशावादी जुयागु खँ धाःगु दु ।

सछिगुलिं मल्याक्क स्टल दुगु उगु ज्याझ्वलय् उदाय् संस्कृति न्ह्यब्वयेकथंया वसः तिसा परम्परागत हलंज्वलं व जातीय लजगाःया ल्वाभः व ज्याभःत नं ब्वःगु खः । अथे हे मनोराजनया निंतिं मस्त म्हितेगु, लवःकवः व दबुली म्येँ, हुलाप्याखं, ख्यालः, फेशन शो आदि नं क्यंगु खः ।

ज्याझ्वलय् समाजया छ्याञ्जे रन्नकाजी तुलाधरं लसकसु यानादीगु खःसा समाजया नायःपाखें हे ज्याझ्वलय् ब्वति काःपिंत सुभाय् देछानादीगु खः । ज्याझ्वलय् लुखा सिरपाःया व्यवस्था नं यानातःगु खः ।