उपेन्द्रया गाडीइ अप्पां कयेकल

येँ (सन्ध्या टाइम्स)/ मधेसी जनअधिकार फारम नेपालया अध्यक्ष उपेन्द्र यादव च्वनावगुं गाडीइ थौं सुथय् वीरगंजय् थःहे कार्यकर्तातय्सं अप्पां कयेकूगु दु । पार्टीया विधान अःखः जिल्ला कार्यसमिति विघटन यात धकाः आक्रोशित जूम्ह पर्सा जिल्ला अध्यक्ष शशीकुमार मियाँया नेतृत्वय् वःगु पार्टीया असन्तुष्ट कार्यकर्तातय्सं पार्टी अध्यक्षया गाडीइ अप्पां कयेकूगु खः । अथे अप्पां कयेकूगु इलय् गाडीइ हे च्वनावःम्ह फोरमया नेतृ रेणुकामरी यादव घाःपाः जूगु दु । नेतृ यादव व केन्द्रीय दुजः हरिनारायण यादवया उपस्थितिइ आइतवाः चान्हय् च्वंगु बैठकं पार्टीया पसा्र जिल्ला समिति विघटन यायेगु निर्णय याःगु खः । जिल्ला समितिं अध्यक्ष मियाँयात विधान अःखः ज्या याःगु द्वपं बिसें पदमुत्त यायेगु निणर्य याःगु खः । जिल्ला समिति विघटन याःगु निर्णययात कयाः महासचिव रामसहाय यादव नापं मेमेपिं नेतातय्सं नं विरोध याःगु दु ।