अर्थराज्य मन्त्री लामा गनया नागरिक?

प्रधानमन्त्री झलनाथ खनालं छुं दिं न्ह्यः जक अर्थराज्य मन्त्रीलय् नियुक्त यानादीम्ह ल्हार क्याल लामा गनया नागरिक खः धइगु विषयलय् विवाद पिहांवःगु दु । वय्कः नापं भारतीय पासपोर्ट व तिब्बती शरणार्थीया कार्ड नं दुगु सीदेवं थुगु विवाद सार्वजनिक जूगु खः । वय्कःनाप भारतीय पासपोर्ट व तिब्बती शरणार्थी तकं दुगु खँ सार्वजनिक जुइवं वय्कः धाथें नेपाःया नागरिक खः वा मखु धइगु विषयलय् नं न्ह्यसः दंगु दु ।

लामां तिब्बती शरणार्थीया कार्ड भारतं काःगु व वय्कः नाप भारतीय पासपोर्ट तकं दुगु पुष्टि जूगु दु । भारतीय पासपोर्ट दुगु खँला वय्कलं हे स्वीकार यानादीगु दु । अंग्रेजी न्हिपौ 'रिपब्लिका'नाप खँल्हाबंलाया झ्वलय् भारतीय पासपोर्ट दुगु स्वीकार यानादीसां वय्कलं उगु पासपोर्ट थःगु नांमं मेपिंसं हे दयेकूगु दावी यानादीगु दु ।

वय्कः तिब्बती शरणार्थी जूगु हुनिं नेपाःस्थित चिनियाँ राजदुतावासं तकं आपत्ति प्वंकूगु दु । दुतावासया अधिकारीतय्सं प्रधानमन्त्री खनालयात नापलाना लामायात मन्त्रीइ नियुक्त याःगु प्रति आपत्ति प्वंकूगु खः । लामा स्वतन्त्र तिब्बत पक्षधर कार्यकर्ता जूगु धासें चिनियाँ दुतावासं च्यूताः प्वंकूगु खः ।

(किपा : www.khempo.com)