पेट्रोलियम पदार्थया अभाव कृत्रिम प्रकृतिया : निगम
नेपाल आयल निगमं माग कथं पेट्रोलियम पदार्थया आपूर्ति जुयाच्वंगुलिं बजाय् खनेदुगु अभाव कृत्रिम प्रकृतिया जूगु दावी याःगु दु ।
रिपाटर्स क्लवं आइतवाः येँय् याःगु साक्षात्कार ज्याझवलय् निगमया कार्यकरी अध्यक्ष दिगम्बर झां येँय् माग कथं पेट्रोलियम पदार्थया आपूर्ति जुयाच्वंसां भारतं आपूर्ति कटौटी जूगु धकाः पिहांवःगु बुखँ हल्ला जक जूगु धयादिल । वय्कलं उगु हे बुखँया हुनिं पेट्रोलपम्पं पेट्रोल सुस्केगु व उपभोक्तातय्सं नं अप्वः न्याना यंकूगुलिं अभावया अवस्था वःगु खँ धयादिल ।
वय्कलं निगमया मासिक घाटा निगू अर्ब थ्यंगु धयादिसें थज्याःगु हे परिस्थिति जूसा: ताः ई तक पेट्रोलियम पदार्थया आपूर्ति सहज जुइमफइगु धयादिल । वय्कलं आपूर्ति यानाः वितरण यायेगु थाय् तक थ्यंकीगु भाः कथं पेट्रोलियम पदार्थया भाः कायम मयासाः नियमित आपूर्ति यायेमफइगु ख्याच्वः तकं बियादिल ।
