पत्रकार महासंघया २३क्वःगु महाधिवेशन येँय् जुइगु

नेपाल पत्रकार महासंघया २३क्वःगु महाधिवेशन येँय् याइगु जूगु दु । पत्रकार महासंघं थौं येँ छगू पत्रकार सम्मेलन यानाः वैशाख २० व २१ गते २३क्वःगु महाधिवेशन येँया प्रज्ञा भवनय् यायेगु जानकारी बिउगु दु ।

'शान्ति, सहमति व संविधान नेपाल पत्रकार महासंघया अभियान' नारा बियाः निन्हुतक न्ह्याइगु महाधिवेशनं महासंघया न्हूगु नेतृत्व ल्यइगु जूगु दु । नेतृत्व लगायत थीथी पदय् उम्मेदवारी मनोनयन दर्ता वैशाख १७ गते, उम्मेदवार सम्बन्धी दावी विरोध, उम्मेदवारया नां लितकायेगु धुंकाः वैशाख १९ गते उम्मेदवारतय् लिप्पांगु नां पिथनीगु खँ महासंघं धाःगु दु ।

जिल्ला, प्रतिष्ठान व एसोसियटस् शाखा यानाः देय्न्यंकया द्वछिं मल्यक दुजःतय्सं ब्वति काइगु महाधिवेशनया बन्द सत्रय् पत्रकारया हकहितया मुद्दाय् सहलह जुइगु खँ धाःगु दु ।