चिचीधंगु दलतय्गु अडान यथावत
येँ (सन्ध्या टाइम्स)/थौं सुथय् संविधानसभाय् दुथ्याःगु २७ गुलिं दलया सर्वददीय बैठक च्वंगु इलय् चिचीधंगु दलया नेतातय्सं थःपिनिगु मागयात पूरा यायेमाः धकाः अडान हानं लिसा काःगु दु। मुक्कं १६ गू दलया प्रतिनिधितय्सं जक ब्वति काःगु उगु बैठकय् मुस्मां, दलित, मधेसी नापं नेपाः राष्ट्रिय पार्टीया सभासद् बुद्ध साय्मिं थःथःपिनिगु पुलांगु एजेण्डायात संवोधन यायेमाःगु माग यानाः अडान तःगु खः। चिचीधंगु दलया नेतातय्सं राज्यपाखें बहिष्करणय् लाकातःपिं समुदायया माग संवोधन मजुइकं गुगुं नं हालतय् संवैधानिक समितिया बैठक न्ह्याके बीगु जुइ मखु धकाः अडान कयाच्वंगुलिं समस्या समाधान यायेगु नितिं धकाः ततःधंगु स्वंगू दलया सहमति कथं थौं सर्वदलीय बैठक सःतूगु खः। उगु बैठकय् स्वंगू दल, संविधानसभाया अध्यक्ष सुवासचन्द्र नेम्वाङ व संवैधानिक समितिया सभापति निलाम्बर आचार्यं थःपिनि माग संवोधन यायेमाः धकाः चिचीधंगु दलया नेतातय्सं अडान तःगुलिं सहलह ब्याकेगु बाहेक थौंया मुँज्यां औपचारिक रुपं छुं नं खँ क्वःछी मफुत ।
