थनिंनिसें नेपालमण्डल लागाय् बन्दया प्रचार प्रसार
येँ (सन्ध्या टाइम्स)/नेवाः नापं ताम्सालिङ स्वायत्त प्रदेश न्हूगु संविधानय् सुनिश्चित याकेगु निंतिं वइगु बैशाख १४ गते याइगु नेवाः व ताम्सालिङ प्रदेश बन्दया झ्वलय् नेवाःतय्सं थनिंनिसें नेपालमण्डल लागाय् प्रचार प्रसार ज्याझ्वः न्ह्याकूगु दु ।
थौं सुथय् नेवाः स्वायत्त राज्य मंकाः संघर्ष समितिया ग्वसालय् सभासद्पिं दिलिप महर्जन, तिर्थराम डंगोल, नेवाः देय् दबूया नायः नरेश ताम्राकार, सानुराजा शाक्य नापं छगू पुचः स्वनिगलं पश्चिम लागाय् वंगु दु। हेटौंडा, धादिङ, तिस्तुङ, पालुङ, त्रिशुली, भरतपुर, नुवाकोटय् प्रचार प्रसारया निंतिं भ्रमण यायेत वय्कःपिं उखे वंगु खः। अथे हे वइगु ९ व १० गते स्वनिगलं पूर्व लागाय् छगू पुचः वनी धाःगु दु। नेवाःतय्सं नेवाः स्वायत्त राज्यया नितिं नेपाल मण्डल लागाय् च्वंपिं नेवाःतय्त हे सचेत याः वनेगु नापं प्रचार प्रसार याः वनेगु थ्व न्हापांगु ज्या जूगु दु ।
थ्वहे दथुइ बन्द ज्याझ्वः ताःलाकेत म्हिगः ज्यापु महागुथिया संयोजनय् येँय् सांस्कृतिक र्याली पिकाल। बसन्तपुलिं सुरु जूगु उगु प्रचारात्मक सांस्कृतिक र्यालीइ नेवाः स्वायत्त राज्य मंकाः संघर्ष समितिया नायः राजभाई जकःमि व ताम्सालिङ संयुक्त संघर्ष समितिपाखें देबकुमार तामाङं न्ववानादीगु खः। उगु सांस्कृतिक र्यालीइ २४ गः धिमे छगू हे बोलय् थानाः वंगु खःसा सहभागीतय्सं लँधुछि पर्चा इनाः वंगु खः। उगु सांस्कृतिक र्याली येँया थँबहीया नरसिंह चोकय् थ्यंकाः क्वचायेकूगु खः ।
थःने, क्वःने व दथु लागाय् सभा
वइगु बैशाख १४ गतेया बन्द ज्याझ्वः ताःलाकेत ज्यापु महागुथि येँ महानगर समितिपाखें येँया थःने, क्वःने व दथु लागाय् ब्यागलं ब्यागलं सभा याइगु जूगु दु। म्हिगः येँया परम्परागत ३२ त्वाःया हे प्रतिनिधित दुथ्याकाः मंकाः मुँज्या च्वनाः नेवाः स्वायत्त राज्यया आन्दोलनया झ्वलय् ज्यापु युवात नं ब्यापक रुपं परिचालन यायेगु नापं उकिया झ्वलय् येँया स्वंगू थासय् सभा यायेगु खँ क्वःछिउगु खः ।
