कन्हय् म्हय्पिइ समय्द्वँ तइगु

येँ (सन्ध्या टाइम्स)/थीथी थासय् जुयाच्वंगु जात्राया झ्वलय् कन्हय् येँया म्हय्पि द्यःया जात्रा जुइत्यंगु दु। थ्व झ्वलय् कन्हय् ल्हुतिपुन्हिया लसताय् म्हय्पि द्यःयाथाय् समय्द्वँ ब्वयेगु व समय्बजि इनीगु ज्याझ्वः दु। जात्राया लागीं तँलाछिइ तयातःम्ह म्हय्पि द्यः थौं सनिलय् जात्रा यंकाः गमय् तइगु चलन दु। जात्रा शुरु याये न्ह्यः वंगु न्हूदँ कुन्हु म्हय्पिइ म्हय्पि अजिमा स्वनिगः समय्द्वँ खलःया ग्वसालय् तुच्चा ज्याझ्वः नं जूगु खः। म्हय्पि अजिमाया जात्रा स्वनिगःया पुलांगु जात्रा मध्ये छगू खः ।