सेनाया समायोजन प्रस्तावप्रति देउवा सकारात्मक
नेपाली कांग्रेसया नेता शेरबहादुर देउवां माओवादी लडाकुया समायोजन बारे सेनां न्ह्यने हःगु प्रस्ताव सकारात्मक जूगु टिप्पणी यानादीगु दु । कांग्रेसया छुं नेतातय्सं उगु प्रस्ताव सेनाया मखसें माओवादीया प्रोपागाण्डा जक जूगु दावी यानाच्वंगु इलय् देउवाया थुगु धापू सार्वजनिक जूगु खः ।
प्रेस युनियनं नेपालगञ्जय् थौं याःगु पत्रकार सम्मेलनय् नेता देउवां माओवादीं लडाकु समायोजनया निंतिं सेना न्ह्यने हःगु प्रस्ताव व बिचाः उपयुक्त जूगु धयादिल । वय्कलं लडाकु समायोजन बिना शान्ति प्रक्रिया पूमवनीगु धयादिसें दकलय् न्हापां लडाकु समायोजन व वयां लिपा जक संविधान निर्माण यायेमाःगु धयादिल ।
सेनां न्ह्यने हःगु प्रस्तावय् सेना, सशस्त्र व जनपथ प्रहरी व लडाकु मिलेयानाः सेनाया अन्तर्गतय् बिस्कं महानिर्देशनालय दयेकेगु खँ न्ह्यथनातःगु दु । उगु प्रस्तावयात माओवादीं नं सकारात्मक जूगु धकाः निर्णय यायेधुंकूगु दु ।
उखे कंग्रेसया केन्द्रीय समितिया मुँज्याय् नं केन्द्रीय दुजःतय्सं शान्ति प्रक्रिया क्वचायेकेत लडाकु समायोजन याकनं यायेमाःगु बिचा: प्वंकूगु दु । मुँज्याय् यक्व दुजःतय्सं सेनाया प्रस्तावय् पार्टी सकारात्मक जुइमाःगु धासें नेतृत्वयात दबाव बिउगु दु ।
