विवाद ज्यंकेगु जिम्मा न्याम्ह नेतातय्त
संवैधानिक समिति अन्तर्गत चिधंगु दलया सभासद्तय्सं तयाच्वंगु थीथी मागया बारे प्रतिवेदन तयार यायेगु जिम्मा न्याम्ह नेतातय्त बिउगु दु ।
समितिया मुँज्याय् सभासद् विश्वेन्द्र पासवना, सदरुल मिया हकलगायत सभासद्तय्सं आदिवासी जनजाति, दलित व मुस्लिम समुदायया अधिकार सुनिश्चित मयायेकं मुँज्या न्ह्याकेमबीगु धासें मुँज्या अवरुद्ध यानावयाच्वंगु खः
उगु हे विषयलय् सहलह यायेत थौं सिंहदरवारस्थित राज्य व्यवस्था समितिया सभाकक्षय् च्वंगु नीन्हय्गू दलया सर्वदलीय मुँज्यां विवाद ज्यंकेगु जिम्मा न्याम्ह नेतातय्त बिउगु खः ।
सभामुख, संवैधानिक समितिया सभापति व स्वंगू प्रमुख दलया शीर्ष नेतातय्त सभासद्तय्सं ल्ह्वःनाच्वंगु मागया बारे सुझाव सहितया प्रतिवेदन तयार यायेगु जिम्मा बिउगु खः ।
अथेहे उगु मुँज्या संवैधानिक समिति अन्तर्गतया उपसमितिया म्याद थप यायेगु निर्णय नं याःगु दु । मुँज्या लिपा माओवादी न्वकु नारायणकाजी श्रेष्ठ 'प्रकाशं' मुँज्यां उपसमितिया म्याद थप यायेगु निर्णय याःगु कनादिल । वय्कलं म्याद गुलीया निंतिं थप यायेगु धइगु बारे धाःसा लिपा सहलह यानाः जक निर्णय याइगु धयादिल ।
