माओवादीं गृह मन्त्री ल्ययेमफुत / पोलिटब्यूरो मुँज्याय् सहलह जुइगु
एकीकृत नेकपा (माओवादीं) थःगु पार्टी पाखें गृहमन्त्री जुइम्ह नेताया नां ल्ययेमफेवं पोलिटब्यूरोया मुँज्या सःतुगु दु ।
माओवादी नायः पुष्पकमल दाहाल 'प्रचण्ड'या न्हू बजारस्थित छेँय् शनिवाः जूगु पदाधिकारीतय् मुँज्या नं गृहमन्त्री जुइम्ह नेताया नांमय् विवाद जूगु खः । प्रचण्डं आः शान्ति मन्त्री जुयाच्वंम्ह वर्षमान पुन 'अनन्त'यात हे गृह मन्त्री दयेकेगु प्रस्ताव याःगु खः ।
तर न्वकु मोहन वैद्य 'किरणं' थःपक्षधर नेता देव गुरुङयात गृहमन्त्रालय बिइमाःगु धयाच्वंगुलिं पार्टी दुने विवाद ब्वलंगु खः । थौंया मुँज्याय् नं निगू खेमां थःथःगु पक्षया नेतायात गृह मन्त्रालय बिइमाःगु अडान कायेवं गृह मन्त्रालयया बारे छुं निर्णय मयासें मुँज्या क्वचाःगु खः ।
गृह मन्त्री जुम्हेसिया नांमय् विवाद जुयाच्वंगुलिं माओवादीं सरकारय् वनीपिं मेपिं मन्त्रीतय् नां तकं बिइमफुनी । माओवादीं आः गृह मन्त्री लगायत मेमेगू मन्त्रीतय् नां क्वःछीत वैशाख ७ व ८ गते पोलिटब्यूरो मुँज्या सःतुगु दु ।
वर्तमान झलनाथ खनाल नेतृत्वया सरकारय् माओवादीयात झिंछगू मन्त्रालय व झिंछगू हे राज्य मन्त्रालय बीगु सहमति जूगु खः ।
