'माओवादी-कांग्रेस मिलेमजूसाः शान्ति व संविधान असम्भव'
एकीकृत नेकपा (माओवादी)या न्वकु डा. बाबुराम भट्टराईं शान्ति प्रक्रिया व संविधान निर्माण यायेत माओवादी व कांग्रेस मिलेजुयाः न्ह्याः वनेगुया विकल्प मदुगु धयादीगु दु । वय्कलं परिवर्तनकारी शक्तिया नेतृत्व यानाच्वंपिं माओवादी व संसदवादी शक्तिया नेतृत्वकर्ता कांग्रेस मिलेमजुइकं शान्ति व संविधान असम्भव जूगु दावी यानादिल ।
यलया सानेपास्थित थःगु हे छेँय् शनिवाः पत्रकार सम्मेलन यानादिसें नेता भट्टराईं कांग्रेस सहितया राष्ट्रिय सहमतिया सरकार आःया आवश्यकता जूगु धयादिल । वय्कलं वर्तमान झलनाथ खनाल नेतृत्वया सरकारयात हे राष्ट्रिय स्वरुपया सरकार दयेकेफइगु नं धयादिल । तर वय्कलं थुगु सरकारयात राष्ट्रिय स्वरुप बिइमफुसाः उकिया विकल्प मालेत तयार जुइमाःगु बिचाः प्वंकादिल ।
राष्ट्रपतिय शासन लागू यानाः शान्ति व संविधानयात पूवंकेमबीगु खँ पिहांवयाच्वंगु धयादिसें वय्कलं च्यान्हु-झिन्हुया दुने दलत दथुइ सहमति कायम जुइमफुसाः देय् दुर्घटना पखे वनीगु ख्याच्वः बियादिल ।
