मधेशी मोर्चापाखें प्रम समक्ष झिंनिगू बुँदे ज्ञापनपत्र
मधेशीतय् मुद्दायात सम्बोधन मयासाः आन्दोलन यायेगु ख्याच्वः बियाच्वंगु संयुक्त लोकतान्त्रिक मधेशी मोर्चां प्रधानमन्त्री झलनाथ खनाल समक्ष झिंनिगू बुँदे ज्ञापनपत्र लःल्हाःगु दु ।
मधेशया मुद्दा लगायत शान्ति प्रक्रिया नापं संविधान निर्माणया विषयत दुथ्याकाः शनिवाः मोर्चां प्रधानमन्त्री समक्ष ज्ञापनपत्र लःल्हाःगु खः । मधेशी मोर्चा आवद्ध मधेशी जनअधिकार फोरम लोकतान्त्रिकया नायः विजयकुमार गच्छदार, तराई मधेश लोकतान्त्रिक पार्टीया नायः महन्त थाकुर व सद्भावना पार्टीया नायः राजेन्द्र महत्तों प्रधानमन्त्रीयात नापलना थःपिनिगु माग प्रति प्रधानमनत्रीया ध्यानाकर्षण याःगु ख: ।
ज्ञापनपत्रय् संविधान जारी याये न्ह्यः शान्ति प्रक्रिया क्वचायेकेमाःगु, संघीयताया ठोस स्वरुप व सीमा बिना संविधान जारी यायेमज्यूगु, सेनाय् मधेशी समुदायया समूहगत प्रवेश, मधेश आन्दोलनया झ्वलय् मखूगु द्वपं बियाः मुद्दा चले यानातःपिनि मुद्दा लितकायेमाःगु लगायत माग याःगु दु ।
अथेहे मतदाता परिचयपत्रया निंतिं नागरिकता अनिवार्यया प्रावधान लितकायेमाःगु, समावेशी सेवा विधेयक अविलम्व पारित यायेमाःगु लगायतया माग ज्ञापनपत्रय् न्ह्यथनातःगु दु ।
