माओवादीपाखें हे शान्ति व संविधान विरुद्ध षड्यन्त्र : पौडेल
नेपाली कांग्रेसया संसदीय दलया नेता रामचन्द्र पौडेलं माओवादी हे शान्ति प्रक्रिया व संविधान निर्माण विरुद्धया षड्यन्त्रय् लगेजुयाच्वंगु द्वपं बियादीगु दु । मेपिंसं शान्ति व संविधान विरुद्ध षड्यन्त्र यानाच्वनाः धकाः धाइपिं माओवादी हे षड्यन्त्रकारी जूगु दावी पौडेलं यानादिल ।
रिपोटर्स क्लब तनहुँ शनिवाः दमौलीइ याःगु पत्रकार सम्मेलनय् वय्कलं माओवादी षड्यन्त्रया प्रमुख मतियार प्रधानमन्त्री झलनाथ खनल जूगु द्वपं तकं बियादिल । वय्कलं माओवादीया ल्यूल्यू वनेगु मत्वःतुसाः खनालया राजनीतिक भविष्य मदइगु दावी नं यानादिल ।
नेता पौडेलं संविधानसभापाखें लोकतान्त्रिक संविधान जारी यायेत फुक्कं दल तयार जूसां माओवादीयात संविधानसभा प्रति विश्वास मदुगु धयादिल । वय्कलं माओवादी वरिष्ठ न्वकु मोहन वैद्यं संविधानसभापाखें राजीनामा बिउगु धइगु माओवादीयात संविधानसभाप्रति विश्वास मदुगु दसु जूगु दावी यानादिल ।
वय्कलं माओवादीं अझ नं हत्या व हिंसा मत्वःतुगु धयादिसें आः जनता माओवादी प्रति धाथें सजग जुइमाःगु ई वःगु धयादिल ।
