कांग्रेसं देय्न्यंक जागरण अभियान न्ह्याकीगु
नेपाली कांग्रेसं शान्ति व लोकतन्त्रया निंतिं देय्न्यंक जागरण अभियान न्ह्याकीगु जूगु दु । 'शान्ति व लोकतन्त्र व लोकतान्त्रिक संविधान - नेपाली कांग्रेसया राष्ट्रिय अभियान' नारा बियाः देय्या थीथी थासय् आभसभा यायेगु ग्वसाःग्वःगु दु ।
कांग्रेसया शुक्रवाः च्वंगु केन्द्रीय समितिया मुँज्यां बैशाख ११ गते निसें देय्न्यंक आमसभा ग्वसाःग्वयेगु निर्णय याःगु खः । जागरण अभियान अन्तर्गत कांग्रेसं येँ लगायत कास्की, झापा, सर्लाही, रुपन्देही, दाङ, कञ्चनपुरय् आमसभा यायेगु योजना दयेकूगु दु ।
थीथी जिल्लाय् आमसभा यायेधुंकाः दकलय् लिपा जेठ ६ गते येँय् केन्द्रीय आमसभा यायेगु खँ कांग्रेसं धाःगु दु । उगु आमसभाय् सभापति सुशील कोइराला, नेता शेरबहादुर देउवा, संसदीय दलया नेता रामचन्द्र पौडेल लगायत केन्द्रीय नेतातय्सं सम्बोधन याइगु ज्याझ्वः दु ।
मुँज्यां शान्ति व संविधानयात प्राथमिकता बिइगु आःया अवश्यक्ता जूगु धासें भातृ संगठनतय् विवादया बारे लिपा सहलह यायेगु खँ क्वःछिउगु दु । कांग्रेस सभापति सुशील कोइरालां नेपाल विद्यार्थी संघ विघटन व मेमेगू भातृ संगठनया अध्यक्षयात राजीनामा बिइत दवाव बीवं केन्द्रीय समितिइ थुकिया बारे विवाद जूगु खः ।
अथेहे कांग्रेसं देशय् हिंसात्मक घटनात अप्वःगु प्रति निन्दा व भर्त्सना यासें सरकारं शान्ति सुरक्षाया व्यवस्था यायेमफुगु प्रति खेद प्वंकूगु दु ।
News Location:
