लिउने लाकातःगु समुदायया सभासद्पाखें सदनय् संघर्ष
येँ (सन्ध्या टाइम्स)/राज्यं लिउने लाकातःगु समुदायया आदिवासी, दलित, मधेसी, मुस्मां लगायतया सभासद्तसें आः थःपिनिगु हक अधिकारया निंतिं संविधानसभाया संवैधानिक समिति नापनापं व्यवस्थापिका संसदय् नं आन्दोलन याइगु जूगु दु ।
दलित जनजाति पार्टीया अध्यक्ष नापं सभासद् विश्ववेन्द्र पासवानं थ्व जानकारी बियादीगु खः। वय्कलं 'सन्ध्या टाइम्स'लिसे खँल्हासें धयादिल, 'वइगु बैशाख ४ गते प्रधानमन्त्री झलनाथ खनालया नापलानाः राज्यपाखें लिउने लाकातःपिं समुदायया माग संवोधन यायेमाःगु माग यासें ज्ञापनपत्र बीगु जुइ, अनं लिपा संसदय् नं आन्दोलन शुरु यायेगु जुइ ।'
आन्दोलन यायेत चिचीधंगु राजनीतिक दलया नापनापं स्वतन्त्र सभासद्त तकं तयार दुगु जुयाः थःपिं उकिया नितिं न्ह्याः वनाच्वनागु खः धयादिल। वय्कलं छु छु दलया सभासद् वइ धइगु खँ आः हे सार्वजनिक मयायेगु खँ कनादिल ।
राज्यं लिउने लाकातःपिं दलित, मधेसी, आदिवासी, जनजाति, मुस्मां लगायतया समुदायया नेपालय् ७५ प्रतिशत सिबें अप्वः दुगु अवस्थाय् इमिगु हक अधिकार स्थापित यायेगु ज्याय् ततःधंगु 'ब्रम्हूवादी' नेतातय्सं पंगः थनाच्वंगुलिं हे थःपिंसं संघर्ष यायेमाःगु खः धकाः धयादिल। दलित नेता पासवानं माग पूरा मजूतले हे थःपिंसं आन्दोलनया निरन्तरता बीगु जुइ धकाः नं धयादिल ।
संवैधानिक समितिइ हानं ल्वापु
दलित, मुस्मां, मधेसी दलतय्सं थःपिनिगु माग पूरा मजुइकं संविधानसभाया संवैधानिक समितिया बैठक न्ह्याकेबीगु जुइ मखु धकाः ख्याच्वः बिउगुलिं समितिया बैठक आः बैशाख ४ गते जक च्वनीगु जूगु दु। थौं च्वनेगु धयातःगु उगु समितिया बैठक ४ गते च्वने न्ह्यः आः वइगु आइतवाः हे सर्वदलीय बैठक च्वनेगु धकाः मू मू राजनीतिक दलया नेतातय् दथुइ सहमति जूगु दु ।
