बाजं थानाः बन्दया प्रचार याइगु
येँ (सन्ध्या टाइम्स)/थ्वहे वइगु बैशाख १४ गते नेवाः व ताम्सालिङ स्वायत्त प्रदेश बन्द ज्याझ्वः ताःलाकेगु बारे थौं च्वंगु निगुलिं जातिया मंकाः बैठकं आन्दोलन सञ्चालन यायेत छगू मंकाः सचिवालय गठन याःगु दु। नेवाःपाखें मल्ल के. सुन्दर व तामाङपाखें परशुराम तामाङ च्वनादीगु उगु सचिवालयया ज्याकू आःयात तामाङ घेदुङ्गया ज्याकुथी तइ ।
बन्द ताःलाकेगु ज्याझ्वः कथं कन्हय् सुथय् बसन्तपुलिं सांस्कृतिक र्याली पिकायेत्यंगु दु। सुथय् ७ बजे बाजं थानाः उगु प्रचार र्याली पिकाइगु ज्याझ्वः दु। अथे हे बैशाख १० गते त्रिपुरेश्वरं छगू मोटरसाइकल र्याली नं पिकाइगु ज्याझ्वः दु ।
बन्द बारे चित्लाङ्ग, टिष्टुङ्गय् नं प्रचार यायेगु लागिं कंस नेवाः सभासद्त समेत जानाः उखेपाखे वनीगु ज्याझ्वः दु।
१४ गते बन्द ज्याझ्वः ताःलाकेत १३ गते रत्नपार्कया शान्ति बाटिकां छगू मसाल जुलुस पिकायेगु ज्याझ्वः नं दयेकूगु दु ।
लिसें थीथी थासय् आमसभा व अन्तर्क्रिया ज्याझ्वः याना वनेगु नं ग्वसाः दु ।
