आइतवाः सर्वदलीय मुँज्या
सिमान्तकृत समुदायया हक अधिकार सुनिश्चित यायेमाःगु माग तयाः चिधंगु दलतय्सं संवैधानिक समितिया मुँज्याय् अवरोध यानाच्वंगु विषययात कयाः आइतवाः सर्वदलीय मुँज्या च्वनीगु जूगु दु ।
आदिवासी, जनजाति, दलित, मुस्लिम लगायत सिमान्तकृत वर्गया माग सुनिश्चित मजुइकं संवैधानिक समितिया मुँज्या न्ह्याकेमबीगु धासें छुं ई न्ह्यः निसें संघीय लोकतान्त्रिक राष्ट्रिय मञ्चया रुक्मणी चौधरी, दलित जनजाति पार्टीया विश्वेन्द्र पासवान, स्वतन्त्र सभासद् सदरुल मियां मुँयां अवरोध यनाच्वंगु खःसा लिपा उकियात नेपाः राष्ट्रिय पार्टीया बुद्ध साय्मिं नं समर्थन यानादीगु खः ।
थौं सभामुख सुभाषचन्द्र नेम्वाङ, संवैधानिक समितिया सभापति निलाम्बर आचार्य व संवैधानिक समितिया दुजःतय् मुँज्यां आइतवाः सर्वदलीय मुँज्या च्वनेगु निर्णय याःगु खः । आइतवाः चिधंगु दलतय् मागया बारे सर्वदलीय मुँज्याय् सहलह याइगु व उगु मुँज्या लिपा संवैधानिक समितिया मुँज्या च्वनीगु निर्णय याःगु दु ।
संवैधानिक समितिया मुँज्या थौं च्वनीगु ग्वसा:ग्वयात:गु ख:सां दलत दथुइ चिधंगु दलया माग बारे सहलह मजूगुलिं मुँज्या लिछ्या:गु ख: ।
