'मिसन पूमवंकूतले थ्व सरकार न्ह्याःवनी'
प्रधानमन्त्री झलनाथ खनालं वर्तमान सरकार मिसन ज्वनाः वःगु सरकार जूगुलिं उगु मिसन पूमवंकूतले न्ह्याःवनीगु दावी यानादीगु दु ।
विक्रम संवतया न्हूदँ २०६८ क्यंगु लसताय् थौं प्रधानमन्त्री निवास बालुवाटारय् ग्वसाःग्वःगु तुच्चा ज्याझ्वलय् प्रधानमन्त्रीं खनालं सरकारं शान्ति व संविधान निर्माण यायेगु मिसन ज्वनाः वःगुलिं उगु मिसन थ्व हे सरकारं पूवंकीगु धयादिल ।
सरकारं गुवलय् पूर्णता काइ धका: पत्रकारतय्सं न्यंगु न्ह्यसलय् वय्कलं सरकारं याकन हे पूर्णता काइगु धयादिल । पार्टी दुने नं सरकारया विषयलय् विवाद दुगु स्वीकार यानादिसें प्रधनामन्त्री खनालं पार्टी दुने व पिनेया विवादयात व्यवस्थित यानायंकेगु धयादिल । वय्कलं थ्व सरकारयात व्यापक एकताया सरकार दयेकेगु कुतः जुयाच्वंगु धयादिल ।
तुच्चा ज्याझ्वलय् राष्ट्रपति डा. रामवरण यादव, उपराष्ट्रपति परमानन्द झा, सभामुख सुभाषचन्द्र नेम्वाङ, माओवादी नायः पुष्पकमल दाहाल 'प्रचण्ड', कांग्रेस वरिष्ठ नेता शेरबहादुर देउवा, मन्त्रीत, थीथी दलया नेतात नापं विदेशी कुटनीतिक नियोगया अधिकारीतय् ब्वति दुगु खः ।
तर सरकारया नेतृत्व यानाच्वंगु एमालेया वरिष्ठ नेता नापं पुलाम्ह प्रधानमन्त्री माधवकुमार नेपाल, केपी शर्मा ओली धाःसा तुच्चाय् उपस्थित जुयामदी । अथेहे कांग्रेस सभापति सुशील कोइराला व संसदीय दलया नेता रामचन्द्र पौडेल नं उगु तुच्चाय् ब्वति कयामदी ।
News Location:
