खनालयात थःगु हे गुट दुनें नं विरोध
येँ (सन्ध्या टाइम्स)/प्रधानमन्त्री झलनाथ खनालया समस्या झन् झन् अप्वया वंगु दु। वय्कःयात थःगु हे पार्टीया छगू खेमां ला न्हापांनिसें हे असयोग यानाच्वंगु जुल। आः वय्कःयात थःगु हे गुटपाखें नं असहयोग जुइगु सम्भावना अप्वया वःगु खँ विज्ञ सूत्रं धाःगु दु ।
आः नकतिनि वय्कलं मन्त्रिपरिषद् विस्तार यानादीबलय् थः मनूत जक तल धकाः पार्टीया केपी ओली व माधव नेपाल गुटं विरोध यानाच्वंगु दुसा स्वय्म वय्कःया हे गुट दुने नं केवल प्रमया न्ह्यः लिउ चाःचाःहिलाच्वनीपिंत जक मन्त्री दयेकल धकाः मेगु विरोध नं पिहां वःगु दु। अज्याःगु हे विरोधया कारणं म्हिगः राज्यमन्त्री नियुक्त जूम्ह राधा ज्ञवालीं सपथ ग्रहण तकं बहिष्कार यानादीगु दु ।
उखे प्रम खनालं थुगुसीया मन्त्रिपरिषदय् स्वनिगःपाखें छम्हेसित हे मन्त्री मदयेकल धकाः मेगु विरोध नं शुरु जूगु दु। थ्व सरकारय् नं खय् ब्रम्हुत जक अप्वः दुथ्याकूगु खँयात कयाः राजधानीवासीत वय्कः खनाः तम्वःगु खँ सूत्रं धाःगु दु। अथे हे वय्कःया ज्या खनाः वय्कःया सल्लाहकारत नं तम्वयाच्वंगु खँ सीदुगु दु ।
