ख्वपय् खुकुरी चाःहिकाः आतंक

ख्वप (सन्ध्या टाइम्स)/थुगुसी जूगु बिस्काः जात्राय् आः गनं ल्वापुख्यापु मजूनिसां म्हिगः बहनी लिबाक धाःसा गोलमढीइ छम्ह मनुखं खुकुरी चाःहिकाः आतंक मच्चे याना बिल ।

बहनी मोटरसाइकल गया वःबलय् लँय् लंगुरबुर्जा म्हिताच्वंपिंसं लँ त्वःता मबिल धासें उम्ह मनुखं खुकरी चाःहिकाः स्थानीय मनूतय्त पाः जूगु खः। लिबा वयात ज्वनेत स्वःबलय् व बिसिउँ वनेत सफल जुल ।

थौं यःसिं क्वःथलीगु:
बिस्काःया झ्वलय् थौं यःसिं क्वःथलीगु ज्याझ्वः दु। म्हिगः बहनी याउँक हे थ्व यःसिं थनेगु ज्या जूगु खः। थौं सुथंनिसें अन यःसिंयात पुजा यायेगु ज्या जुयाच्वंगु दु। यःसिं थनातःगु जुयाः थौं ख्वपय् सुं सित धाःसा थौं हे वयात सिथं यंकेगु ज्या याये मजिउ धाइ। यदि यंके हे माःगु अवस्था जुल धाःसा भैलःखःया बेताःद्यःया ख्वाः त्वपुयाः जक सिथं यंकेमाः धाइ। म्हिगः हे तालाकोय् ल्हाः मदुम्ह यःसिं नं थंगु खः ।

पर्यटक अप्वल:
थुगुसी ख्वपय् बिस्काः जात्रा स्वइपिं पर्यटक नं न्हापा स्वयां अप्वःगु खँ ख्वप महानगरपालिकां धाःगु दु। न्हापा न्हापा बिस्काः जात्रा धाल कि ल्वापु जुइगु जुयाः पर्यटकतय्त जात्रा क्यने हइ मखु। थुगुसी जात्रा शान्तिपूर्ण जूगुलिं पर्यटकत अप्वः खँ धाःगु दु ।