१४ गते संविधान मवःसा छु जुइ?
येँ (सन्ध्या टाइम्स)/न्हूगु संविधान जारी यायेत बियातःगु जेठ १४ गतेया न्हि न्ह्यःने वःलिसे संविधान पिहां वइगु सम्भावना नं म्हो जुजुं वंगु दुसा मेखे बजारय् यदि १४ गते संविधान जारी मजुल धाःसा छु जुइ धइगु चर्चा नं व्यापक जुया वंगु दु ।
प्रधानमन्त्री झलनाथ खनालं जेठ १४ गते संविधान जारी जु हे जुइ, मजुल धाःसा छु यायेगु धकाः फुक्कं दल च्वनाः राष्ट्रिय सहमति कायम यानाः न्ह्याः वनेगु जुइ धयादीगु दु।
सरकारयात समर्थन यानाच्वंगु माओवादीं जेठ १४ गते चान्हय् जूसां संविधान वइ धासें यदि मवल धाःसा जनविद्रोह यायेगु जुइ धकाः ख्याच्वः बीधुंकूगु दु। तर माओवादीं याइ धाःगु जनविद्रोह गज्याःगु खः आः तक स्पष्ट मजूनि। अय्नं उगु अवस्थाया लागिं धकाः माओवादीं न्हूगु दस्ता जनस्वय्म सेवकयात परिचालन यायेधुंकूगु दु ।
नेपाली कांग्रेस संसदीय दलया नेता रामचन्द्र पौडेलं यदि माओवादीं ग्वाहालि यात धाःसा जेठ १४ गते संविधान वइगु सम्भावना अझ नं दनि धयादीगु दु। छुं जुयाः संविधान मवल धाःसा छु यायेगु धइगु खँय् धाःसा आः तक छुं बिचाः हे मयानिगु खँ नं वय्कलं कनादिल ।
उखे थुकियात हे ध्यानय् तयाः राष्ट्रपतिं नं माःगु तयारी यानाच्वंगु चर्चा दु ।
