नेवाः देय् गुथिइ न्हूगु नेतृत्व
येँ (सन्ध्या टाइम्स)/नेवाः देय् गुथि नेपालमण्डलया म्हिगः जूगु प्यक्वःगु तःमुँज्यां मोहन बहादुर महर्जनया अध्यक्षताय् न्हूगु कार्यसमिति ल्यःगु दु।
देय् गुथिया न्वकु पदय् डा. चुन्दा वज्राचार्य, विजय वज्राचार्य व सुशीला शाक्य च्वनादीगु दुसा मू छ्यांज्ये कृष्णभक्त मानन्धर, छ्यांज्ये गोपाल धौभडेल व दांभरि पदय् सरस्वती श्रेष्ठ च्वनादीगु दु। दुजलय् ३४ म्ह च्वनादीगु दु ।
तत्कालिन नायः नरेन्द्रभक्त हाडाया सभापतित्वय् जूगु तःमुँज्याया उलेज्या मूपाहां प्रा.माणिक लाल श्रेष्ठं यानादीगु खः। ज्याझ्वलय् न्ववासें वय्कलं न्हूगु संविधान हयेत ब्रम्हू दुने नं क्वय्या जाति व धर्मय् मुस्मांतलिसे जानाः आदिवासीत न्ह्यज्यायेमाः धयादिल। ज्याझ्वलय् बिष्णु चित्रकारं च्वयादीगु 'नेपाल लिपि व नेपालभाषा' सफू नं मूपाहां श्रेष्ठं विमोचन यानादीगु खः ।
न्वकु किरण शाक्यं लसकुस यासें न्ह्याःगु ज्याझ्वलय् सभासद्पिं दिलीप महर्जन, बुद्ध साय्मि, सल्लाहकार लक्ष्मण राजवंशी, नेवाः न्ह्यलुवा मल्ल के. सुन्दर, नेवाः देय् दबूया नायः नरेश ताम्रकार, पुष्पराज राजकर्णिकारपिंसं न्ववानादीगु खः ।
