बाजं स्यनेकुथिया उलेज्या
येँ (सन्ध्या टाइम्स)/लोप जुया वनेत्यंगु व पुलांगु पुस्ताय् जक सीमित जुयाच्वंगु परम्परागत व सांस्कृतिक महत्वं जाःगु नेवाः बाजं न्हू पुस्तायापिंत स्यना वनेगु तातुनाः नीस्वंगु नेवाः बाजं स्यनेकुथि छगू ज्याझ्वःया दथुइ औपचारिक उलेज्या जुल। थनया नेपाल आदर्श मा. वि गणबहालय् स्यनेकुथिया नायः विपेन्द्र महर्जनया सभापतित्वय् जूगु उलेज्याय् मूपाहां कथं सभासद् दिलीप महर्जन झायादीगु खः ।
स्यनेकुथिया न्वकु धर्म मुनिकारं लसकुस यानादीगु ज्याझ्वलय् नेवाः देय् दबूया नायः नरेश ताम्राकार, ज्यापु महागुथि येँ महानगर समितिया कार्यबाहक नायः रामबहादुर डंगोल, नेपालभाषा स्यनेकुथिया नायः डा. महेशमान श्रेष्ठ, येँ महानगरपालिका नेवाः ज्याकःमि गुथिया न्वकु इन्द्रमान सिंह सुवाल, बाद्यवादक न्हुछेबहादुर डंगोल व नेवाः स्वायत्त राज्य मंकाः संघर्ष समितिया नायः राजभाइ जकःमिपिंसं बाजं स्यनेकुथिया ज्या ताःलायेमा धासें थःथःगु बिचाः प्वंकादीगु खः ।
स्यनेकुथिया दुजः त्रिरत्न मानन्धरं सुभाय् देछानादीगु खःसाः थ्व हे वइगु बैशाख १ गते निसें धिमय् व बँय् पुइगु तालिम नं बीगु जूगु दु। स्यनेकुथिं बिउगु जानकारी कथं धिमय् पाखें झिंन्याम्ह व बँय् पुइगु तालिमय् गुम्ह प्रशिक्षार्थी दुसा तालिम छन्हु अतः यानाः स्वला तक न्ह्याइ ।
