'खनालया मनू जक थपे जुल'
येँ (सन्ध्या टाइम्स)/प्रधानमन्त्री झलनाथ खनालं म्हीग बहनी आकाझाकां घोषणा याःगु न्हूपिं मन्त्रीतय् नांधलखय् थःगु पक्षया मनूत जक दुथ्याकल धकाः एमाले नेताद्वय केपी ओली व माधव नेपाल तम्वःगु खँ सीदुगु दु ।
मन्त्री नियुक्त यायेगु लागिं ओली व नेपाललिसे नं सल्लाह यानाः जक निर्णय यायेगु धइगु न्हापाया सहमतियात वेवास्ता यासें प्रम खनालं थः यःयःथे मनूतय् नां घोषणा याःगु धासें ओली व नेपालं यदि थज्याःगु हे तालं प्रधानमन्त्री वन धाःसा सरकार याकनं हे क्वःदली धकाः ख्याच्वः बिउगु खँ नं सूत्रं धाःगु दु। वय्कःपिंसं प्रम खनालं गृह मन्त्रालय तकं झण्डै माओवादीयात बीत्यंगु धासें यदि बिल धाःसा सरकारय् वनाच्वंपिं एमाले मन्त्रीतय्त लित सःतेगु जुइ धकाः नं धयादीगु खँ सीदुगु दु ।
सोमवाः बहनी खनालपाखें गुगु मन्त्रिमण्डल विस्तारया ज्या जुल, थ्वहे पार्टीया नीति अःखः खः धासें थुकियात कयाः पार्टी दुने सहलह ब्याकेगु खँ नं वय्कःपिंसं धाःगु दु।
लिसें प्रधानमन्त्रीपाखें थथे यकःति रुपं सुयाकें मन्यँसे थः मनूत जक तयाः मन्त्रिमण्डल विस्तार याःगु खँयात कयाः सहलह ब्याकेत ओली-नेपाल पक्षया केन्द्रीय दुजःतय्गु जक बिस्कं बैठक च्वनेत्यंगु खँ नं सीदुगु दु। थ्वहे वइगु वैशाख १४ गते नेवाः व ताम्सालिङं बन्द घोषणा यानातःगु न्हिनिसें एमालेया केन्द्रीय बैठक शुरु जुइत्यंगु दु ।
