सरकारं पूर्णता कायेमफुगु प्रति सुदया च्यूताः
नेकपा (एमाले)या नायः झलनाथ खनाल प्रधानमन्त्री जूगु निला लिपा नं सरकारं पूर्णता कायेमफुगु खँ प्रति नेपाःया निंतिं भारतीय राजदूत राकेश सुदं च्यूताः प्वंकूगु दु ।
प्रधानमन्त्री खनालनाप थौं जूगु खँल्हाबंलाय् राजदूत सुदं छु कारणं आः तक पूर्ण आकारया मन्त्रिपरिषद गठन जुइमफुगु धासें च्यूताः प्वंकूगु खः । सिंहदरवार स्थित प्रधानमन्त्रीया ज्याकूथी जूगु खँल्हाबंलाय् प्रधानमन्त्री खनालं सरकारयात राष्ट्रिय सरकारया स्वरुप बिइगु कुतः जुयाच्वंगु धयादिसें उकिया निंतिं फुक्क दलतनाप सहलह जुयाच्वंगुलिं सरकारं पूर्णता कायेत लिबानाच्वंगु लिसः बियादीगु खः ।
अथेहे नापलाय् ज्याय् राजदूत सुदं शान्ति व संविधान निर्माणया बारे नं प्रधानमन्त्रीनाप खँल्हाबंला यानादीगु खः । वय्कलं शान्ति व संविधान निर्माणय् भारतं बियाच्वंगु ग्वाहालि यथावत दुगु जानकारी नं बियादीगु खः ।
