एमालेया न्हूपिं मन्त्रीत पाखें सपथ ग्रहण / विष्टं लिपा जक सपथ काइगु
प्रधानमन्त्री झलनाथ खनालं नेकपा (एमाले)या जक मन्त्रीत दुथ्याकाः स्वक्वःगु खुसिइ विस्तार यानादीगु मन्त्रिपरिषदया दुजःतय्सं थौं छगू ज्याझ्वःया दथुइ सपथ ग्रहण याःगु दु ।
राष्ट्रपति भवन शितल निवासय् जूगु विशेष ज्याझ्वलय् राष्ट्रपति डा. रामवरण यादवया उपस्थितिइ प्रधानमन्त्री खनालं प्यम्ह मन्त्रीतय्त पद तथा गोपनियताया सपथ ग्रहण याकादीगु खः ।
सोमवाः विस्तारित मन्त्रिपरिषदय् उर्मिला अर्याल स्थानीय विकास, रघुवीर महासेठ सिँचाइ, गोकर्ण विष्ट ऊर्जा, भानुभक्त जोशी वन तथा भूसंरक्षण व युवराज कार्कीयात सामान्य प्रशासन मन्त्रीत कथं प्रधानमन्त्रीं नियुक्त यानादीगु खः ।
थौं जूगु सपथ ग्रहण ज्याझ्वलय् न्याम्ह मध्ये प्यम्ह मन्त्रीतय्सं सपथ ग्रहण याःसां अज्ञात पुचःया खुकुरी प्रहारं घाःपाः जुम्ह ऊर्जा मन्त्री विष्टं धाःसा लिपा जक सपथ ग्रहण यानादीगु जूगु दु । वय्कः घाःपा जुयाः अस्पतालय् वासः याकाच्वंगुलिं सपथ ग्रहण ज्याझ्वलय् उपस्थित जुयामदीगु खः ।
अथेहे थौं हे सिंहदरवार स्थित राष्ट्रिय योजना आयोगया ज्याकथी प्रधानमन्त्रीं राज्यमन्त्रीतय्त सपथ ग्रहण याकादीगु दु । राज्यमन्त्रीलय् राधा ज्ञवाली शिक्षा, शत्रुघन महतो स्थानीय विकास, दलबहादुर सुनार सिँचाइ, रामजी शर्मा ऊर्जा, डम्बर सम्बाहाम्फे सामान्य प्रशासन, भगवती चौधरी वन तथा भूसंरक्षण व ल्हारक्याल लामा अर्थ राज्य मन्त्री कथं नियुक्त जूगु खः ।
राज्य मन्त्रीया सपथ ग्रहणया झ्वलय् नं शिक्षा राज्य मन्त्री नियुक्त जुयादीम्ह राधा ज्ञवाली उपस्थित मजुइवं खुम्ह राज्य मन्त्रीतय्सं जक सपथ ग्रहण याःगु खः । मन्त्री ज्ञवालीं थःत राज्य मन्त्रीलय् नियुक्त याःगुलिं असन्तुष्टि प्वंकाः सपथ ग्रहणय् मवःगु खँ सीदुगु दु ।
सपथ ग्रहण लिपा प्रधानमन्त्री खनालं थौं हे मन्त्रिपरिषदया मुँज्या सःतुगु दु ।
