माओवादीं मन्त्रीतय् नां बारे बिहीवाः निर्णय काइगु
एनेकपा (माओवादीं) थःगु पार्टी पाखें प्रधानमन्त्री झलनाथ खनाल नेतृत्वया सरकारय् ब्वति काइपिं मन्त्रीतय् नां बारे बिहीवाः निर्णय याइगु जूगु दु ।
माओवादी स्थायी समितिया मंगलवाः च्वंगु मुँज्यां प्रधानमन्त्री खनालं सोमवाः बहनी विस्तार यानादीगु मन्त्रिपरिषदयात सकारात्मक पलाः धासें थःगु पार्टी पाखें सरकारय् वनीपिं मन्त्रीतय् नां याकनं घोषणा यायेगु निर्णय याःगु दु ।
'प्रधानमन्त्रीं विस्तार यानादीगु मन्त्रिपरिषदयात मुँज्यां सकारात्मक रुपां काःगु दु' मुँज्या लिपा माओवादी प्रवक्ता दिनानाथ शर्मां धयादिल, 'माओवादीया बिहीवाः हानं च्वनीगु स्थायी समितिया मुँज्यां पार्टीं पाखें सरकारय् ब्वति काइपिं मन्त्रीतय् नांया निर्णय याइ ।'
प्रधानमन्त्रीं सोमवाः विस्तार यानादीगु मन्त्रिपरिषदय् एमालेया नेतातय्त स्थानीय विकास, सिँचाइ, ऊर्जा, वन तथा भूसंरक्षण व सामान्य प्रशासन मन्त्रालय जक बिउगुलिं माओवादीं गृहमन्त्रालय थःपिंत हे बिइत तयातःगु कथं थुइकाः प्रधानमन्त्रीयात थुगु पलाःयात सकारात्मया संज्ञा बिउगु खः ।
अथेहे मुँज्यां ऊर्जा मन्त्री घोषणा जुयादीम्ह गोकर्ण विष्टयात अज्ञात पुचलं याःगु सांघातिक हमलाया भर्त्सना यासें अपराधीतयत् याकनं कारवाही यायेत सरकार नाप माग याःगु दु । नापं देय्या थीथी थासय् श्रृंखलाबद्ध रुपं जुयाच्वंगु हत्या, विष्फोट लगायतया घटना प्रति गम्भीर च्यूताः नं प्वंकूगु दु ।
News Location:
