शान्ति सुरक्षाया माग यासें सरकारया राजीनामा माग
प्रधानमन्त्री झलनाथ खनाल नेतृत्वया सरकारं पूर्णता मकानीवलय् हे प्रतिपक्षी दलतय्सं सरकारया राजीनामा फ्वनेगु सुरु याःगु दु । नेपाली कांग्रेस लगायत मधेशवादी दलतय्सं सरकारं शान्ति सुरक्षाया ग्यारेण्टी यायेमफुगु धासें राजीनामा माग याःगु दु ।
रिपोटर्स क्लबं मंगलवाः येँय् याःगु साक्षात्कार ज्याझ्वलय् कांग्रेस केन्द्रीय दुजः डा. प्रकाशशरण महतं येँय् व्यापारीया हत्या व न्हूम्ह मन्त्रीयात आक्रमण जूगु इलय् तकं सुरक्षाया व्यवस्था यायेमफुगु सरकारं तत्काल राजीनामा बिइमाःगु धयादिल ।
गृहमन्त्रालय तकं कयातम्ह प्रधानमन्त्रीं शान्ति सुरक्षाया व्यवस्था यायेमफुगुलिं नैतिकताया आधारय् राजीनामा बिइमाःगु धयादिल । वय्कलं सरकारं अबिलम्ब राजीनामा बियाः शान्ति व संविधान निर्माणया निंतिं लँपु चायेके माःगु धयादिल ।
नेपाल सद्भावना पार्टीया सहअध्यक्ष लक्ष्मण लाल कर्णं सरकारं तत्काल राजीनामा बियाः निकासया लँपु चायेके माःगु धयादिल । वय्कलं सरकारं राजीनामा मबिउसाः थःपिंसं संसद् अवरुद्ध यानाः वा सतक आन्दोलन यानाः जूसां सरकारयात राजीनामा याकाः त्वतेगु धयादिल । वय्कलं मधेशय् जुयाच्वंगु बम आतकं सरकारं याकाच्वंगु द्वपं नं बियादिल ।
उखे माओवादी स्थायी समिति दुजः देव गुरुङं प्रधानमन्त्रीं गृह मन्त्रालय थःपिंत मबिउसाः सरकारय् वनीपिं थप मन्त्रीतय् नां मछ्वयेगु धयादिल । वय्कलं न्हय्गू बुँदे सहमतिया आधारय् गृह मन्त्रालय थःपिंत दयेमाःगु धयादिसें उगु हे सहमतिया लिधंसाय् थःपिंसं प्रधानमन्त्री त्वःताःगु धयादिल ।
अथेहे एमाले पोलिटब्यूरो दुजः प्रदीप ज्ञवालीं माओवादीयात छुं नं हालतं गृह मन्त्रालय मबिइगु धयादिल । एमालें माओवादीयात गृह मन्त्रालय मबिइगु धकाः संस्थागत रुपं निर्णय यायेधुंकूगुलिं गृह मन्त्रालयया म्हगसः मखंकेत वय्कलं माओवादीयात इनाप नं यानादिल ।
